Ka jingsara iaki symbai dieng trai ri kadei kawei pat ka lad kamai pisa

Syllad | The Rising MeghalayaJune 6, 2020

Ka jingsara iaki jingthung ne ki symbai dieng trai ri, ka dei kawei pat ka lad ban kamai kajih haka juh ka por ban pynneh pynsah ïaki dieng kiba iadei sha kane ka thain.

Kane kala paw hadien ba kawei Village Organisation, kaba la tip kum ka Iatreilang Village Organisation kaba kdup ïa ki 10 tylli ki Self Help Group (SHG) kiba trei haki jait kam bapher bapher kila sara iaki symbai dieng kiba la tam na ki khlaw ki btap bad die kylla pat iaki.

Kane ka Iatreilang Village Organisation kadei kaba  na ka shnong Khliehtyrshi, kaba hap hapoh ka Thadlaskein Block. Kadei ka VO kaba la ïaid kham shakhmat napdeng ki 40 tylli ki VO kiba don hapoh Thadlaskein, katkum ka report jong ka Meghalaya State Rural Livelihood Society (MSRLS), ka dei peit ïa kine ki kynhun ban ieng hala ki kjat lajong.

Ka Chongri Rymbai, president jong ka Iatreilang VO, kala ong ba ïa kane ka kam sara jingthung ne symbai dieng la ai buit da ka BDO Thadlaskein ka Kong Baiantimon Blah. Ka la ong ka kong Blah kala pynshlur ïaki ban sara ïaki jait dieng ne symbai dieng kiba ïadei sha kane ka hi ka thain namar ba ki dieng kiba wan na kiwei ki jaka ne bar jylla kim ïahap sha kane ka thain.

Kumta kane ka kynhun ha u snem 2019 kala sdang ban sara ïaki jingthung haka Lumpyrdi Khliehryrshi. Kila sara haduh da ki hajar hajar tylll ki tynrai dieng kiba la tip kum dieng Lin, dieng Snein, dieng Syrum bad dieng Soh nalor kiwei kiwei kiba mih hala shnong.

https://youtu.be/jn8DpNw4SMc

“Ngi la sdang ban sara ïa kine ki jingthung bad ngi la lap ba ki heh ki san. Ngi la ioh jingirap ruh na ka ophis Agriculture da ki sboh wieh 12 byrni bad ki plastik ban sara ia kine ki symbai dieng,” ong ka kong Rymbai.

“Kane kala ai mynsiem ïa ngi bad ngi la iohi ïa kane ka jingsara jingthung kum kawei na ki lad ban kamai, kumta ngi la nang pynbun shuh iaka jingsara ia kine ki jingthung,” la ong ka Rymbai bad bynrap ba ha une u snem kila ïoh ban die haduh 1200 tynrai haka dor 8 tyngka shi trai u dieng.

Mynta u snem kila lah ban pynmih haduh 8000 tylli ki symbai dieng.

Hynnin ka sngi kaba dei ka sngi ban rakhe kyrpang ban pynneh pynsah ïaka mariang “World Environment Day” kane ka VO kala sam ïaki symbai jingthung ne dieng sha kiwei ki kynhun  VO kiba don ha Thadlaskein Block ba kin ia thung iaki dieng hala ki jong ki shnong jong ki.

“Wat la ka long tang ka jinsdang ha kaban sara iaki jingthung, hynrei ka la long pat ka nuksa ia kiwei ki VO kiba don hapoh ka Thadlaskein Block ba kin sdang iaka kam sara jingthung ba har rukom bad ban pynneh ïa ki symbai kum u kba,  jhur bad kiwei kiwei,” ong u Ma Kevin Slong Block Manager MSRLS.