Ka jingsdang iaka PRIME ka pynshlur iaka rukom seng kam lajong ha jylla Meghalaya

Syllad | The Rising MeghalayaSeptember 13, 2022

Ka jylla Meghalaya ka la sdang ban kiew ha ka liang ban seng kam lajong bad ban pynmih kam ruh ia kiwei, hapoh ka jingbtin lynti bad ka jingiarap u myntri rangbah ka jylla u Conrad K Sangma, daka jingpynmih ia kiba bun ki skim ba iadei ha ka ban seng kam lajong.

Haba kren ha kane ka liang, u myntri rangbah ka jylla, u Conrad K. Sangma u la ong, “ka sorkar ka la wan rah shibun ki jingpyrshang ha kine ki snem ba la lah ban pynshlur ia kane ka rukom sengkam lajong ha ka jylla da ka ba pynshlur ia ki samla ban phai khmat sha kane ka liang bad ban peit thuh ia ka jinglah jong ki ban trei ha kano kano ka kam ka ba ki don sap, bad iarap ruh ban pynbiang ia ki jingdonkam jong ki. Kawei na kine ki lad ki ba ka sorkar ka la pynmih ban pynshlur ia ki samla ka long ka program PRIME ka ba la ai shibun ki jingmyntoi ia ki nongshong shnong ka jylla khamtam ia ki samla ki ba thrang ban seng la ka jong ka kam. Lah ban sakhi, hapoh ka ne ka program PRIME, bun na ki nong seng kam ki la ioh jingmyntoi shibun ha baroh ka jingiaid lynti ka jong ki. Ka program ASPIRE pat ka long ka wei na ki lad ai jinghikai ia ki samla ha ki ba bun ki liang lait na ka jingleit skul bad kiwei kiwei. Nga dap da ka jingkmen ban iohi bad lap ba ki nongseng kam lajong ha ka jylla ki long ki bat rei hok met bad mynsiem ba wat ka jingwan lynshop jong ka khlam ia ka pyrthei baroh kawei ruh kam shym la pynduh mynsiem ia ki ban poi sha ka thong.”

Ka nongseng ia ka GreenNE Origins, ka Ayoshee Beriwal, ka long kawei na ki nongseng kam ha ka jylla, ka don ka thong ban pynsngewthuh ia baroh ban long kiba peitngor khyndiat sha ka liang ka koit ba khiah, da kaba pynmih ia ki ba bun ki jingbam na ki jingthung jingtep ba ngi ioh na ka mei mariang kum u shynrai, u sying, ka ngap, ki jait snepkor ba bun jait, u cardamon, ki jingpynbang ia ka sha bad kiwei kiwei. Ki jingdie ba nyngkong eh jong ka Ayoshee ki long u shynrai ha ki jingsong barit ba ka la lah ban die sha ki ba ha iing ki paralok bad ki para ba ia trei lang. Ka la iathuh, “Ka jingwan rah ia ka ne ka program PRIME ka la pynkylla shisha ia ka jingim jong nga, bad ka la pynshlur ia nga ban shaniah ialade bad ban ialeh ban poi sha ka thong. Nga la ieh ia la ka kam, ha ka jingwan jong ka khlam bad da nga phai dien mynta nga kmen shisha ba nga khlem babe ia ka jingrai jong nga bad mynta nga khmih lynti ba kane ka kam kan nang roi nangne shakhmat.”

Ka GreenNE ka la nang kiew da ka jingtrei shitom jong ka Ayoshee Beriwal bad da ka jingiarap jong ka sorkar jylla lyngba ka skim PRIME. Ha u Kyllalyngkot jong u snem 2020, la sdang ia ka ne ka program PRIME da u myntri rangbah ka jylla u Conrad K Sangma, da ka jingpyntreikam bad ka jingiasnoh kti lang jong baroh kiba la wan shakhmat ban sdang bad ai kam ruh ia kiwei, ka ba la pynkylla shisha ia ka jingling jingman ki samla bad ki briew ha ka jylla.

Ka Ayoshee ka la rung ha ka program PRIME ha u Risaw, ka la ioh jingmyntoi shibun ha ka ban pynlut pynsep ia ki jingsdang kam jong ka. Ka la ioh jingmyntoi ruh na ki program bapher bapher ba la ai da ka Program PRIME ha jylla, ka la ioh jingpynshai halor ka jingeh ki nongrep bad ka jingtreikam jong ki.

Haba kren halor ka jingshem jong ka, ka Ayoshee Beriwal ka la ong, “Nga long shisha kaba donbok ban ioh lad ban leit sha Bangkok bad ka kynhun PRIME Meghalaya ban pyniaid iew sha kiwei pat ki jaka jong ka pyrthei.”

Ka Tura, Meghalaya ka don kumba 872mitar na duriaw, ka dei ka jaka ba itynnad ba ka Ayoshee ka la heh la san. Ka thong jong ka Ayoshee ka long ban pynlong ia ki kynthei kiba lah ban ieng ha la ki jong ki kjat, da kaba ai kam ai jam ia ki. Ka ai ruh iaka sur jong ka ia ki kynthei. Ka GreenNE jong ka Ayoshee ka iarap ban pynkiew ia ki nongrep bad ban pynneh pynsah ia ki jingdon jingem ba ka mei mariang ka la ai kyrpang ia ka jylla Meghalaya bad ia ka thain shatei lam mihngi jong ka Ri.

Ka ne ka Program PRIME ka iarap ban ai bai seng da ka loan kumba 5 lak tyngka kaba lah ban kot shaduh ka 25lak tyngka.

Kumba ka jylla ka don ia ki jingdonkam ha baroh ki liang, ka Sorkar ka la sdang ban phai khmat ban pynshlur shuh shuh ia ki briew ka jylla ban kner la ki kti ban seng la ki jong ki kam. Da ka jingsdang ia ka PRIME (Promotion and Incubation of Market-Driven Enterprises), ka la pynshlur bad ai mynsiem shibun ia ki briew ka jylla, ban trei shitom ha ka sap ba ki don, ban pynneh pynsah ia ki jingdon jingem ka jylla, ban pynkiew ha baroh ki liang ia ka jinglong jingman ha ka jylla, ban pynioh nong ia ka jylla ha baroh ki liang.

Ka jylla Meghalaya ka don ia ka rukom khein jait ka ba kyrpang tam ha ka pyrthei. Ki kynthei ki lamkhmat ha kiba bun ki liang. Katkum ka jingwad bniah la lap ba ki kynthei ki basdang la ka jong ka kam ki la lah ban ioh jingmyntoi haduh kumba 10klur tyngka. 20 na ka shispah jong ka jingiarap pisa ba la pyntreikam da ka PRIME Kickstart Grant bad ka PRIME Innovation Scaleup Loan, la buh ban iarap kyrpang ia ki kynthei. 40 + kiba sdang ki long ryngkat bad ki nongai buit, 60 + kiba sdang kam da ka ba register, 50+ kiba ia rap da ka jylla bad ki nongbei pisa, bad 20 + ki basdang na ka jingbym don eiei. 10% na ka jingbuh pisa bad ka PRIME Kickstart Grant bad PRIME Innovation Scaleup Loan la mang na ka bynta kito ki ba hap ban sdang na duh tynrai. Ka jingkiew ha ka jingai jinghikai ia ki samla ha kiba bun ki liang lait na ka pule, ka long shisha ka ba iarap ia ki ban sngewthuh ia la ka jinglah bad ban trei shitom ha ki sap ki phong ba ki don. Contributed