Ka jingthmu den iaka Wah Umngot kan theh umpjah iaka kam kyntiew Tourism: Reachingson Kongwang

Syllad | The Rising MeghalayaAugust 10, 2021

Ka kynhun ki nongpyniaid iaki kam jngohkai ha shilynter ka Wah Umngot kumjuh ha War Jaiñtia baroh kawei kila pyrshah jur iaka jingthmu jong ka MeECL ban den iaka Wah Umngot ha Moosakhia na ka bynta ban pynmih bording.

Ka kane ka kynhun ki nongpyniaid iaki kam jngohkai kiba la im jakpoh bad ai kam ia kiwei na ka kam shang suwari kila pynpaw ka jingpyrshah kaba jur halor kane ka jingthmu ban den iaka Umngot bad kila rai ban iakynduh iaki heh ophisar ka tnad Tourism ban iasyllok bad ban pynpaw iaka jingpyrshah.

Haka sngi Nyngkong, kine ki kynhun kiba pyniaid iaki kam jngoh ha War Jaintia kila pynlong iaka jingiakynduh lang ban iakren sani halor kane ka kam namar ba lada den iaka Wah Umngot ki bynta ba sharum jong ka wah kaba bun ki jaka kiba la khring iaka nongwan kai suwari kin shah ktah bad kan ktah iaki khun samla kiba la im jakpoh na ka kam jngoh kai.

Ia kane ka jingialang la pynlong haka jingialam u Reachingson Kongwang Chairman Darrang Tourism Promotion and Development Society.

Baroh ki nongpyniaid iaki kam jngohkai ha War Jaintia kila pynpaw ka jingpyrshah kaba jur, namar ba kila treishitom bha ha kine ki snem kiba la dep ban kyntiew iaka kam jngohkai ha ka thain War Jaintia khamtam ka Wah Umngot naduh Amkoi, Shnongpdeng, Darrang bad Dawki.

“Ka kam jngohkai pyrthei ka long kaba ai jingmyntoi ym tang ïaki nongpyniaid hynrei ïa kiba bun ki samla shynrang bad kynthei kiba la nang bala stad bad kiba kwah ban ieng hala ki jong ki kjat na kiba bun tylli ki shnong ka thaiñ haka thain war Jaintia. Kane ka jingthmu ban den iaka Wah Umngot kan theh umpjah iaka jingpyrshang kiba bun ki samla ban kamai jakpoh na kam shang suwari,” la ong u Reachingson Kongwang Chairman Darrang Tourism Promotion and Development Society.

“Ka kam jngoh ka iaid ryngkat ryngkat bad ka jingpynneh pynsah iaka mariang bad ban tyngkai iaki mrad ki mreng, ki dieng ki siej bad kiwei kiwei ki jingthaw ba im, hynrei lada ka sorkar ka iaid shakhmat ban tei iaka dam ha Wah Umngot baroh kine ki jingbuh jingsat kin sa shah ktah,” la bynrap u Reachingson.

‘Ngi angnud ban pynrung iaka War Jaintia haka World Map ne ban pynpaw iaka shaka pyrthei kum kawei na ki jaka ba kynsai ban shangkai namar ka War Jaintia ka riewspah bha haka jingbuh jingsat u barim bad kiba la ioh ruh iaka jingithuh na ASI ne Archaeological Survey of India,” la pynkut u Reachingson Kongwang.