Ka jingthmu weng ka Congress na ka EC ha KHADC ka dei tang ka kam kai: Bah Titos

Syllad | The Rising MeghalayaDecember 10, 2024

U nongialam ka United Democratic Party (UDP) bad ka liang pyrshah ha Khasi Hills Autonomous District Council (KHADC) u Bah Titosstarwell Chyne ha ka 9 tarik Nohprah u la shim ba ka rai jong ka Congress ban weng noh ia lade na ka Executive Committee ba la ialam da ka National People’s Party (NPP) tang ar bnai shwa ka elekshon sha ki ADC ka dei tang ka kam kai bad ka kam biej tang ban da rapjot.

Haba kren sha ki lad pathai khubor u Bah Titos u la ong ba ka Congress ka la iatreilang ha syndah syndah bad ka NPP na ka bynta ban pynkhyllem noh ia ka EC kaba lai snem shiteng ba la ialam da ka UDP ha KHADC.

“Ka dei ka kam kai ha khmat u paidbah. Balei ki pynbor mynta ban weng noh na ka EC haba naduh kaba sdang ki la kyrshan ia ki ban pyniasoh sha ka EC ban pynkhyllem ia nga,” u la ong.

“Ka dei ka kam leh tamasa bad ka kam biej. Ki (Congress) ki kwah ban pynbiej ia u paidbah. Ki tharai ba ki paidbah ki dei ki biej. Kane ka jingthmu ban mih noh na ka EC ka dei tang ban da rapjot bad ialam bakla ia u paidbah,” ong une u nongialam ka UDP da kaba bynrap ruh ba ki paidbah kin ai ka jingsneng kaba biasng ha ka elekshon ka ban wan.

Kine ki arngut ki MDC ka Congress kiba kynthup ia u Deputy Chief Executive Member u Bah Pynshngainlang N Syiem uba mihkhmat na Mawkhar Pynthorumkhrah  bad u Bah Ronnie V Lyngdoh uba mihkhmat na Mylliem ki la pynkhreh ban mih noh na ka EC ha KHADC shwa ka elekshon ka ban wan, kata hadien ba ki la shah pynbor ha ki nongtrei ka party kumjuh ha ka AICC.

Ki tyllong khubor ki pyntip ba shen yn sa shim ia ka rai halor katei ka kam khamtam haba buh ha ka jingmut ba u Bah Pynshngainlang N Syiem uba dei ruh u Working President ka Congress un sa pynkhreh ban iakhun biang ha kane ka elekshon ka ban wan na kane ka party.

“Kumta ruh ka jingbteng ban pynbor ka lagh ban pynlong ia u Bah PN Syiem ba un ym don da kiwei pat ki lad ki lynti hynrei ban mih noh na ka EC ba la ialam da ka NPP ha KHADC,” ong ka tyllong khubor.