Ka jingtip shaphang ka Tika COVID-19

Syllad | The Rising MeghalayaMay 3, 2021

Ka District Task Force For COVID-19 For Vaccination, East Khasi Hills District ban pynshlur bad ban ai jingtip khambniah shaphang ka Tika (Vaccination) COVID-19, kala pynmih paidbah iaka thup jingkylli bad jubab ha kaba iadei bad ka jingai dawai tika.

Kine harum kidei ki jingkylli bad jubab ban tip shaphang ka Tika COVID-19:

1. Balei ba nga donkam ban ai tika Covid 19?

• Da kaba ai tika Covid 19 ka ai jingiada ia ngi na u khniang Covid 19.

• Ka iarap ha ka ban pynduna ia ka jingjur jong ka jingpang ban lait na ka jingthiah hospital bad na ki jingshitom jur kiba lah ban ialam haduh ka jingiap.

• Ka iarap ruh ha ka ban pynduna ia ka jingsaphriang jong u khniang jingpang.

2. Nga lah ne em ban ai tika Covid lada nga don jingpangshini, BP, Pang klongsnam, khyllai, cancer etc?

• Haoid, ka long kaba donkam eh ia kiba don ia kine ki jingpang ban ai ia ka tika Covid 19, namar kine ki briew ki kham kloi ban kem bad shah ktah jur ka jingshitom na u khniang Covid 19. Bad ki iioh ka jingshitom kaba jur na ka daw ba ka bor met ka tlot ba ki la don lypa kiwei pat ki jingshitom.

3. Hato nga lah ban long biej/anna lada nga ai tika Covid 19?

• Em!, kane kam lah ban long namar ia ki vaccine la shna bad test janai bha ha shwa ban pynlait paidbah bad ban pyndonkam ia ki. Ha ka jylla Meghalaya la dep ai vaccine ia palat 2,50,000 lakh tam ki briew kynthup ia ki doctor bad ki nos ruh bad kam don kano kano ka jingshahktah kaba kum kata.

4. Balei ba haba test, long ‘Positive’, hynrei khlem paw bad don jingpang, kum ka jyrhoh, pang ryndang, baiongkhlieh etc? Hato ka jingpang Covid ka long kaba shu Thok?

• 80% na ki briew ba kem ia une u khniang ki long ki bym paw ka jingshitom (Asymptomatic). Kane ka lah ban long ba ka bor iada jong ka met jong ki ka khlain ban ialeh pyrshah ia u khniang Covid 19. Hynrei kine ki donkam hi ban long kiba husiar da kaba deng ka mask bad shongkhop ha la iing namar shisien ba la test positive ki lah ban pynsaphret ia u khniang sha kiwei pat.

5. Balei ba u briew ba don jyrhoh, pang ryndang, baiongkhlieh u lah ban long Covid ‘Negative’?

• Ka jingpang jyrhoh, pang ryndang, baiongkhlieh, ki lah ban dei na kiwei pat ki daw ne ki jaid jingpang, ym tang na u khniang Covid 19.

6. Lada nga ai tika Covid 19, kata ka mut ngam kem pang shuh?

• Ka tika Covid ka ai jingïada ïa ngi na ka jingpang Covid. Phin dang lah hi ban kem pang lada phim bud ryntih ïa ki kyndon ïada ba lah bthah ka sorkar, hynrei ka jingjur jong ka jingshitom ka kham duna. Hadien ba shim ïa ka tika Covid 19 ki kyndon ïada ba la buh Ka sorkar donkam ban bud ryntih kata- ban deng Mask, ïa jngai na iwei iwei (physical distance), lehkhuid bad thet bha ki kti man ka por (hand sanitizing), pynmlien ïa lade ba nym ktah ïa ki bynta jong ka dur khmat.

7. Balei ba nga dang hap ban deng Mask hadien ba la dep ai Tika Covid 19?

• Ka shim por haduh 42/60 sngi ia ka met ban shna ia ki shipai iada, hadien ba la dep ai tika Covid 19.

• Ki vaccine barabor ki treikam 95-97% naka 100.

• Phin dang lah ban pynsaphriang ia u khniang sha kiwei pat ki bym shym ai tika. Namar kata ka donkam ia ngi ban deng ia ki mask ha baroh ki por.

8. Kan don jingktah   (side effect) haka met lada nga ai Tika Covid 19? Bad haduh katno sngi kin neh?

• Kumba long kiwei pat ki dawai Tika (Vaccines) kalah ban don ka jingktah malu mala kum:

a. Jingshit met.
b. Sngewtlot met.
c. Kthakhlieh
d. Pang met/ dohksah.
e. Jingsngewkhriat.
f. Pang ha ka jaka inject.
Kine ki jingktah ki dei ban jah tang hadien 2/3 sngi.

9. Kum kiei ki kot ba donkam ban rah haba leit ai Tika Covid19?

Kawei na kine harum:
Adhaar/ Driving License/Pan Card/EPIC
MHIS Card.
Passport.
Ophis ID.

10. Hadien ba la dep ai Tika Covid 19, lada nga sngew shitom ngan leh kumno?

• Kumba long kiwei pat ki dawai Tika (Vaccines), ka lah ban don ka jingktah malu mala kum ka Jingshit met, Ktha khlieh, Pang met/ dohksah, Jingsngewkhriat, pang ha ka jaka inject etc. Kiba bun hi ki briew kin sngew ia kine, hynrei ngim dei ban sheptieng ia ki, namar ba kane ka pyni ba ka Tika ka treikam, ba ka met ka ialeh ia une u khniang ban pynmih ia ki shipai iada (antibodies) ha ki met jongngi.
  Hynrei ladaphi sngew shitom jur, sngewbha pyntip sha ki ASHA/ANM/Doctor mar mar.

11. Kiei ba dei ban leh ne phikir ha ka por ba don ha ki jaka ai injection?

• Phi dei ban shong shwa kumba shiteng kynta eiei hadien ba la dep ai Tika Covid 19.

• Lada don jingsngewpher ha ka met, pyntip mar mar sha ki ASHA, ANM, Nurse.

• Kynmaw ban deng ia ka mask, sait khuid ia ki kti bad pynjngai kumba 6 phut na kiwei.

12. Katno sien hap ban ai ia kane ka injection bad hadien katno sngi na kawei ka dose ba ar?

• Ar sien (dose). Hap ban ai hapdeng 45-60 sngi na ka First dose ban pyndep ia kane ka injection Tika.

13. Hadien katno sngi kane ka injection kan treikam ne pynmih iaki shipai iada         (antibodies) haka met u Briew?

• Ki shipai iada (antibodies) kin sdang mih hadien artaiew ynda la dep ai ia ka sien (dose) kaba ar.

14. Balei ba ia ki khyllung khlem ai tika Covid 19?

• Haduh mynta ïa ka Covid 19 vaccine la shna da kaba test shwa tang ha kiba 18 snem shaneng, namar kata ym pat lah ban ai sha ki khyllung ne ki ba hapoh 18 snem ka rta. La ïohi ba une u khniang Covid 19 u kham ktah ïa ki ba la Rangbah ka rta bad kiba don kiwei pat ki jingpang ha ka met. Kumta la test bad shna shwa ban ai ïa ka covid vaccine na ka bynta kiba la rangbah ka rta. Lehse hadien yn sa test bad shna ruh na ka bynta ki ba 18 snem shapoh.

15. Hato ka ba ai Tika Covid 19 ka lah ban ktah ia ka jinglong Shynrang/jinglong kynthei jong nga?

• Kam don ka jingshisha halor kane ba pyni ba ka ktah ia ka jinglong shynrang ne kynthei jong ki ba ai injek covid 19.

16. Kiei ki test na ka bynta U Covid 19?

• Rt-PCR
• Antigen Test
• Antibody Test.

17. Lah ban long ba ki test ki long kiba bakla? Namarba don ki por ba ia uwei u briew shisien test negative bad la test hadien pat positive ne da khongpong.

• Kane ka jia namarba, lehse la test ia u briew ha ka por ba u khlem pat don ki dak ki shin jong ka jingpang lane shwa ba un bit ia une u khniang, lane ha ka por ba u dang shu ia bit ia u khniang kumta ynda test ha kum kine ki por ka paw negative, hynrei haba test biang hadien katto katne sngi u lah ban long positive pat.

18. Hato ka jingpang Covid ka ktah tang ia ki ba la rangbah ka rta bad kiba don jingshitom lypa?

Ka jingpang Covid ka lah ban ktah ia baroh u briew, naduh khyllung haduh ba la rangbah. Hynrei kumba long, kiba la rangbah bad ki da don jingshitom lypa ki kham shah ktah bun ha u Covid-19.

19. Kumno lah ban iada na u Covid 19.

Da kaba deng ia ka mask bad tap ia shyntur bad khmut ka ai jingiada ialade bad ia kiwei ruh.

Ban ia jngai kumba 6 phut iwei na iwei katba lah, khamtam na ki briew ki bym ithuh < Ai ia ka tika Covid 19.

Da lehkhuid bad ban sait bad sanitised ia ki kti man ka por. Bad ban ym ktah than ia ki khmat, khmut bad shyntur.

Kiar na ki jingialang paidbah.

20. Balei ba donkam ban deng Mask bad ban iajngai iwei na iwei?

Lada u briew ba kem pang Covid 19 u jyrhoh ne synriah (Sneeze), kane ka pynmih ka jynhaw kaba don lang u khniang Covid ha ki, kiba lah ban pynbit sha kiwei. Da kaba deng ia ki Mask bad Leh Social distance ka iada bad pynduna ia kane ka jingbit sha lade bad sha kiwei.

21. Hato ka injek tika Covid ka lah mo ban pyn lyngki ia u briew ne ka briew?

• Em. Ym don kano kano ka jing lap da ki scientists ban pyni ba ka injek tika Covid ka pynlyngki ia u shynrang ne kynthei. Ka jingpang Covid 19 ruh ka khlem pyni ba uno uno uba ioh ia ka ,u kylla lyngki noh.