Ka Jowai kam dei ka sor lymne ka nongkyndong

Syllad | The Rising MeghalayaDecember 13, 2020

Uwei u rangbah na Lumpariat Jowai, u ma Joseph Khonglah ula ong “Ka Jowai kam dei ka sor lymne ka nongkyndong namar ba ka ioh tang ka nam sor, hynrei ka duh noh pat bun ki lad ban wanrah iaka roi ka par.”

“Ki shnong ha nongkyndong ki myntoi bun shah iaka Jowai namar ba tyllun ki skim sorkar bad bun ki longïing kiba duk ki ioh myntoi na ki skim sorkar bad ki bor shnong ki ioh ruh ka lad ban pynphet pynpar iaki lad pynroi pynpar na ki skhim sorkar kaba kynthup ki skim ka na ka sorkar jylla bad sorkar kmie,” la ong u ma Joseph haba kren haka jingïalang ïathir jingmut jong ka Synjuk Ki Waheh Shnong Jowai kaba long haka Sngi Saitjain ha Dulong.

Ha kane ka sngi ka Synjuk Ki Waheh Shnong Jowai kala pyllait paidbah ruh iaka riti treikam jong ka. Ïa kane ka riti treikam la pyllait paidbah da u Wh. SQ Sumer, u nongthoh khubor barim ka sor Jowai kum u kongsan. La iadonlang u ma Alan Niangti bad u LD Lakiang kiba long ki president bad secretary ka Synjuk Ki Waheh Shnong Jowai.

“Pynduh  noh iaka jingsngewpher jingmut bad ai ba naduh mynta ka sngi kaba phi la ioh iaka constitution phin treikam katkum ka mat treikam jong ka da ka mynsiem iatylli kawei ban wanrah iaka roi ka par ka Jowai bad ka District baroh kawei,” la ong u Wh SQ Sumer.

Shuh shuh u ma Jospeh ula ong “Ka Synjuk Ki Waheh Shnong ka dei ban khot iaki jingialang naka por sha ka por ban iathir jingmut shuh shuh ha kaba iadei bad ki kam pynroi ka Jowai kaba kynthup iaka khuid ka suba ka shnong ka thaw.”

U Ma Bishar Plain, u wei na ki nongshong shnong ka Jowai ula ai jingmut ban thaw iaka Grievance Committee bad ki Task Force Committee ban iakren sani bha halor ki kam pynroi ka Jowai.

U Ma HH Mohrmen ula ong “Ki Waheh Shnong ki dei kiba la shah jied ha u paidbah jong ka shnong bad ki don ka bor ka iktiar ban iasaid na ka bynta ka eh ka shon ki shnong ki thaw. Ki Waheh Shnong ne ka Synjuk Waheh Shnong kim dei ban trei tang kum ki sengbhalang, hynrei ki don ka bor kaba kham halor kaba ka sorkar ka dei ban ithuh ia phi.”

Ula ong shuh shuh ba kane ka synjuk kadei ban long kum ka council ne kata ka bor kaba mih shakhmat ban rah iaka sur u paidbah sha ka sorkar.

Uwei pat u rangbah u ma R Lamar ula ong “Ka Politic ka don beit hangno hangno ruh, hynrei dei ban pynduh pyndam iaka party politic ha kane ka synjuk khnang ba kano kano ka rai ne ka sur kaba mih na kane ka synjuk kanlong ka sur jong u paidbah.”

Ha kane ka jingiathir jingmut bun kila pynpaw ka jingbynniaw iaka jingrah jong ka Sorkar iaka PWD North Division sha Shangpung bad kila ong ba kane kadei ka jinghikai bad kam dei shuh ban jia nangne shakhmat khnang ba kiei kiei  kiba la don lypa kin neh ha Jowai bad ia kaba ka sorkar ka kwah ban kyntiew kyrdan iaki nongkyndong ka dei ban wanrah da kiba thymmai.

U ma Alan Niangti, ula ong ba kane ka synjuk kan buddien ia baroh ki skim bad ki project ba sahteng naduh ka Umngot Water Supply Project, Iawmusiang, MCH Hospital, ka khuid ka suba, ka surok shnong bad kiwei kiwei ki lad pynroi ban pynbha pynmiat iaka sor Jowai bad ki khap sor.