Ka Jowai kan long ka sor kaba donbok tam: Kan ioh iaka surok kaba shongdor 78 lak shi kilometre

Syllad | The Rising MeghalayaAugust 25, 2022

Ki sor Jowai kan long kaba donbok tam ha kaba shen kan ioh iad haka surok kaba jyllih bad kaban shna haka dor kaba T.78 lak shi kilometre namar ka Sorkar MDA kala rai ban siang rong thymmai ne resurfacing ha jinglut kaba T 26 klur tyngka na bynta 33 kilometre.

Ia kane la iathuh da u MLA Jowai Constituency uba long ruh u President jong ka NPP West Jaintia Hills District u Ma Wailadmiki Shylla ha ka sngi Balang haba ïakren bad nongthoh khubor hadien ka jingrakhe jingdap shiphew snem jong ka NPP ha Infinity Restaurant, Jowai.

Ula kubur ba kumba long mynta ki internal road ne ki surok shnong hapoh Jowai ki long kiba sniew tasam khamtam na ka daw ka jingjur slap. Ula ïathuh ba haka jingmang (sanction) kaba nyngkong ka sorkar Jylla ka la ai T. 12 klur lyngba ka World Bank bad hadien ka jingsorjamin, ka sorkar ka pynkiew ïaka estimate shaka T.26 klur.

Shu shuh ula bynrap ba ïaka estimate la dep ban submit bad ka tender ruh la dep khot bad la issue ruh ïaka work order ïa u contractor.

U Ma Wailadmiki ula pynthikna ba yn pyndep iaka jingsiangrong ia ka surok kaba baroh 33 Kilometre hapoh u bnai Nohprah mynta u snem.

Haba ïadei bad ka Landfill ne ka jaka theh ñiut, u MLA jong ka Jowai u ïathuh, kumba long haduh mynta ki dang pyrshang sop sop namar kim nud shuh ban pynpaw pyrthei namar ki ïohi ba haka jingpyrshang kaba nyngkong ka ïingbishar jong ka Meghalaya High court ka kynthoh ne comment ba ka don ka jingleh politik haba ïadei bad kane ka issue dei na kata ka daw ym nud shuh ban wanrah paidbah ïaka.

Halor ka Beautification ne ka jingpyni itynnad jong ka sor Jowai, u Ma Wailadmiki u la ïathuh ba ka Sorkar Jylla ka la rai ban pynlut haduh T.12 klur na bynta katei ka project bad u contractor kumba long mynta ula sdang ban pynhap ïaki tiar ki tar ban sdang noh ïaka jingpynshna ïaki lynti ïaid kjat ne footpath, ban buh ïaki solar light, ban pynbha briew ïaki lad hapoh Jowai bad ban shna ïaka Open Air gym hajan quarter u DC ha Mynthong.

Halor ka politik u Wailadmiki ula kren kob ba ka NPP kan jop bun bad ula bynrap shuh shuh ba ka party kan sa jop baroh san tylli ki constituency ha West Jaintia Hills District.

Haba ïadei bad ka jingdap 10 snem ka party NPP, u Ma Wailadmiki ula pynkynmaw ba ia ka party la shuit la shor nyngkong eh ha West Jaintia ha ïing ka Kong Phidalia Toi bad nangne ka party ka sdang ïaka jingïaid lynti.

Ula ong shuh shuh hapdeng ka jingïaid lynti kaba 10 snem ka NPP ka don haduh 23 ngut ki MLA hapoh ka Jylla Meghalaya, 7 ngut ha Manipur, uwei ha Arunachal, uwei u MP jong ka Rajya Sabha bad kawei ka MP jong ka Lok Sabha.

Ha jingïalang rakhe jingdap shiphew snem la don ryngkat u Chief Executive Member jong ka JHADC u Ma Thombor Shiwat, u General Secretary ka NPP WJHD u Ma Donboklang Kharjana nalor kiwei kiwei.