Ka Jowai Municipal Board ka dei ban pynthikna ban ym don shuh ka jinglum thup ki niut ha sor: Meghalaya HC

Syllad | The Rising MeghalayaOctober 20, 2023

Ka iingbishar Meghalaya High Court ha ka sngi Palei haka hukum kaba la pynmih kala bthah ia ka sorkar jylla ba kan pynthikna ba ka Jowai Municipal Board (JMB) kan khmih ba kan ym don kano kano ka jingpynlong jaka lum thup ne theh niut ha kino kino ki jaka ha sor Jowai tad haduh ba ka sorkar kan dep pyntreikam ia ka jaka bret niut kaba biang.

“Ka sorkar jylla ka dei ruh ban pynthikna ba ka JMB ba kan bud ryntih ia ka jingbthah khnang ba kan ym don kano kano ka jingpynlang ia ki niut ki nier bad ki jaboh jabain ha kino kino ki jaka ha ki bynta jong ka sor Jowai, kata tad hadien ba la pyntreikam ia ka jaka theh niut kaba pura,” ong ka bench jong u Chief Justice Sanjib Banerjee bad u Justice W Diengdoh haba shim bishar ia ka PIL ba la ujor da ka Synjuk Ki Waheh Shnong Jowai.

Hadien ba la pyntreikam ia kane ka jaka theh niut, ka sorkar jylla ha ryngkat ka  Jowai Municipal Board kin khmih ba ki niut ki nier na ka sor Jowai ki dei ban poi sha kane ka jaka theh niut.

Ia kane ka plan dei ban bishar bniah ha une u bnai ban wan khnang ban lah ban pyntreikam noh naduh ka sngi kaba nyngkong hadien ba la dep ban pynbit pynbiang ia katei ka jaka theh niut, hukum ka iingbishar.

Ha ka jingbishar iaka mukotduma, ki nongujor ki la pynpaw ba wat hadien ka jingpynmih hukum kaba la dep da kane ka iingbishar, hynrei kam shym la don ka jingwan lum niut tista khamtam na ki nongshong shnong na ki bynta jong ka sor Jowai. Katba na ka liang ka JMB ka la pynpaw ba ka la bud ryntih ha kaba iadei bad kane ka jingbthah.

Katkum ka jingpynmih hukum kaba khatduh ka jingpynkhreh ia ka 10-TPD solid waste–management system. Ka sorkar jylla kala ong ba la dep ban pyniar sha ka 70 percent naduh katei ka por. Ki kaiphot ba hashwa ba la file da ka sorkar jylla ka pyni ba ia kane ka jaka theh niut yn lah ban pyntreikam noh ha kaba kut jong une u snem.

U Additional Advocate-General u la ong ba kam dei ban don kano kano ka jingpynslem ha kaba iadei bad kane ka bynta, bad ka kyrmen ruh ba kane ka jaka bret niut kan sdang ban treikam noh ha kaba kut jong une u snem lane la kumno kum shitaiew hadien kane. 

Kane ka jingujor kaba thmu na ka bynta ka jingbit jingbiang jong ki paidbah la iohi ba ka la treikam. Hynrei, lada ka don kano kano ka jingdkoh ha ka bynta jong ka Jowai Municipal Board, ki nong ujor lane kino kino ki briew kiba shah ktah ki lah ban wan mih sha ka iingbishar, pynpaw ka iingbishar.