Ka JSU kam sngew iahap iaka jingkhang khaii pateng bad ka ri Bangaldesh lyngba ka LCS Dawki

Syllad | The Rising MeghalayaAugust 6, 2020

Ka Jaintia Students’ Union, War Jaintia Circle kam sngew iahap iaka jingkhang iaka khaii pateng bad ka ri Bangladesh lyngba ka Land Custom Station, Tamabil, Dawki tang namar ka jingsyier iaka khlam COVID-19.

U President ka JSU War Jaintia Circle u Eddy Kery Pohtam bad u General Secretary u Kerrydiam Lamin ha u kyrwoh ba kila phah kila pynpaw ba “Ngi hap ban im ryngkat bad u khniang coronavirus bad lada ngi bud iaka jingbthah jong ka sorkar bad ka tnad ka koit ka khiah kam don jingeh ban plie iaka khaii pateng bar ri bad ka ri Bangladesh,”

“Mynta bun na ki nontreibylla naduh ki nongniah trok, ki nongtih maw, ki nongbylla sngi ba har rukom kiba shaniah tylli haka kam khaïi kamai kajih na ka jingkhaii bar ri bad ka ri Bangladesh ha War Jaintia bad ki kiwei kiwie ki thain ki la mad ia ki jingeh naduh bala khang na ka bynta ban iakhun pyrshah iaka khlam coronavirus,” la ong u President JSU War Jaintia Circle u Eddy Kery Pohtam.

“Lada ka khaii pateng ka plie da kaba bud ryngkat bad ki kyndon kiba la bthah ka sorkar, ngam tharai kan buh jingma iaka shnong ka thaw bad ka jylla, namar ba ngim lah ban im khlem kamai kajih bad ngin hap ban im ryngkat bad une u khniang Coronavirus da kaba sumar ialade bad ban bud iaki kyndon ba la ai ka sorkar.

Kane ka jingshangeh ka jingkhaii pateng bad ka ri Bangladesh kala buh ruh ia ki nongkhaii (Exporter) ha ka jingeh kaba khraw tam naduh ban siew iaki ram haki bank bad ban siew iaka nong jong ki nongtrei, kumta lada bteng ban khang ne sangeh iaka jingkhaii pateng kan nang nang wanrah iaka jingduk jingkyrduh ym tang iaki nongkhaii, hynrei iaki nongtrei bad ka ioh ka kot ka jylla,” ong u President JSU War Jaintia Circle u Eddy Kery Pohtam.

“Ka JSU ha kaba nyngkong kala pyrshah ia kane ka jingthmu plie iaka khaii pateng bad ri Bangladesh, hynrei haba ka sorkar kala kular ban pynbiang iaki jingdonkam katkum ki jingbthah jong ka MHA ban iada na ka jingpang khlam, kala rai ban ai ka jingkyrshan kaba pura ban iaid beit ka khaii ka pateng.

Kan long kaba eh lada ka jingkhang dam ka bteng khlem ki lad ban pynmih pisa ban ioh ban siew ia ki tulop ia ki briew kiba mih shakhmat, kata ki Doctor, ki Nurse, ki Pulit, ki nongtrei sorkar kiba iadei kam ban peit khmih ia ka leit ka wan ki briew kiba nabar bad kiwei pat. Ngi donkam ruh ban pynbiang ia ki lad jingsumar kata ki Ambulance, ki Hospital, ki tiar ne ki kor sumar bad kiwei pat, hynrei lada ka sorkar ka hiran haka ioh ka kot kan buh jingeh ia ngi ki riewpaidbah namar ka sorkar ruh kan kyrduh haka ioh ka kot,” la ong u General Secretary u Kerrydiam Lamin.

Ka JSU kala kren shai ba kam sngew iahap ban khang iaka jingkhaii bar ri ha LCS Dawki bad kala kyntu ia baroh ki nongkhaii bad nongshalan bad ki nongniah kali bad ki nongbylla ban bud ryntih iaki jingbthah jong ka sorkar bad ka tnad ka koit ka khiah ban iakhun pyrshah iaka khlam bad ban pyndkut ia u kynjri jingpur ka khlam.