Ka kam hikai ka la dawa ym tang ban aijingtip hynrei ban pynkup bor ruh ia ki khynnah skul: Lahkmen

Syllad | The Rising MeghalayaSeptember 6, 2024

Ka ophis u District School Education Officer, West Jaiñtia Hills, haka 5 tarik Nailur ka la rakhe ia ka Teachers’ Day kaba 63 da ka jingialang ba iphuh iphieng hapoh District Library Auditorium, Mynthong, Jowai ha ka jingiadon lang u Bah Lahkmen Rymbui, MLA 7 – Amlarem bad Chief Adviser ka Sorkar Meghalaya kum u Kongsan ha ryngkat ka Additional Deputy Commissioner ka Kong B. Blah kum ka Symbud Kongsan nalor kiwei pat.

Ha ka jingkren u Bah Lahkmen u la pyrto ia u synniang uba ki nonghikai ki la noh bad ia ka jinglen lade ka jong ki ban saindur ia ka jingim bad ka lawei jong ki khynnah skul.

U la ban jur ba ka jinghikai kam dei shuh ka kam routine kaba suk, hynrei ka dei ka kam kaba dawa na ki nonghikai ym tang ban ai jingtip hynrei ban pynkupbor ruh ia ki khynnah skul bad ban ialam ia ki ban long ki nongshong shnong kiba don ka jingkitkhlieh kiba lah ban iaid lyngba ia ka jingeh jong ka pyrthei mynta.

U Bah Lahkmen u la ai khublei ia ki nonghikai namar ka jingaiti bad jingminot jong ki da kaba ithuh ia ka jingpyrshang jong ki ban iai bteng ban pyniadei wat hapdeng ki jingeh kiba stet ha ka imlang sahlang.

“Ka kamram jong ki nonghikai ka iaid palat ban pynnang pynstad ïa ki jingmut jingpyrkhat kiba dang rit, ka kynthup ïa ka jingai ïa ki khynnah skul ïa ka jinglaitluid ban pyrkhat, ban pynrung ïa ka jingkyrmen bad kaba kongsan eh ka long ban pynsan pynrangbah ïa ki ban long ki briew kiba bha,” u la bynrap.

U la pynpaw ruh ia ka jingkmen ia ka jingkiew jong ki nonghikai ha kaba pynbha ia ki sap jong ki lyngba ki jinghikai bapher bapher, kynthup ia ki online platform kum ka NISHTHA bad kiwei pat. U la pynpaw ia ka jingdonkam jong ka jingpynroi ia ka kam kaba bteng bad ka jingpyniadei bad ki jingthmu bad ki jingangnud kiba kylla jong ki samla pule, kiba mynta ki don ia ki lad ki lynti kiba kham heh ban ia kaba mynshuwa.

“Kito ki sngi ba ki samla pule ki don tang khyndiat ki thong ki la jah noh. Ki samla mynta ki don ki jingangnud bapher bapher bad kam long kaba suk ïa ki nonghikai ban ïalam ïa ki sha ki lynti ba ki la jied”, u la kynthoh.

Rakhe ka Jylla ia ka Teachers’ Day kaba 63, Pyllait u CM ia ka CM-IMPACT ba duna kiba pass ha ka SSLC

Nalor kata u la kyntu ia ki nonghikai ba kin iai pynthymmai ia lade, da kaba pynksan ba ki kamram jong ka jinghikai mynta kim kynthup tang ia ka jinghikai ha ka liang ka jingpule hynrei ka jingpynkhreh ruh ia ki khynnah skul ban iakynduh ia ka pyrthei kaba nangkiew man ka por da ka jinglah ban shah bad ka jingshaniah .

Ha kajuh ka por u khot ia ka jingkitkhlieh lang, kaba kynthup ym tang ia ki nonghikai hynrei wat ia ki kmie ki kpa, ka imlang sahlang bad ki bor sorkar ban kyrshan bad kyntiew ia ka rukom hikai. U la kyntu ruh ïa ki samla pule ban trei shitom bad pdiang ïa ka jingpule kaba bteng, da kaba pynksan ba ym don ki lynti lyngkot sha ka jingjop.

Ha kane ka jingrakhe la pynkup burom ïa ki nonghikai ba pawkhmat da ki khusnam ‘District Awards’ na ka bynta ka jingnoh synñiang ba kyrpang jong ki. La sam ruh ia ki Memento bad ki Certificate sha ka Kong Diamond Paswet, Assistant Lecturer, Government Boys’ Higher. Secondary School; Bah. Emperor Gassah, Head Master, Trangblang Govt U.P School, Trangblang; bad u Bah Pratap Singh Khonglah, Head Teacher, SR Manner Memo. Govt Lower Primary School, Sohkha; u Bah Carefully Gassah, Scout Master, Assistant Scoutmaster, Jowai Open Scout Troop; bad ka kong Grecorisa Sana, Guide Captain, Lissi Pearl Guide Company.

La pynphuh pynphieng shuh shuh ia kane ka sngi lyngba ki jingshad bad jingrwai na ki khynnah skul.