Ka kam ïalehkai ka dei ka lad ïoh kam ïoh jam: Treiborlang

Syllad | The Rising MeghalayaFebruary 19, 2019

JOWAI: U Nongïalam ka JSU Shillong Circle u Treiborlang R Suchen ula ong ba ka kam ïalehkai ka dei kawei lad ïoh kam ïoh jam jong ki samla kiba don ka sap ka phong, kumta ula kyntu ïaki samla kiba don ka sap ka phong ba kin kiar na ki jingmlien ba sniew bad pyndonkam hok ïaka sap ïalehkai ban ieng hala ki jong ki kjat.

Ka kam ïalehkai haka jylla jong ngi naduh ka Football, Cricket, Badminton, Martial Arts mynta kila sdang mih ki khlur ïalehkai bad kiba bun hi ki pleïar ki wan na Rilum Jaiñtia, u la ong u Treiborlang haba kren haka jingïalehkai football ba ar sngi ka shnong Amkoi, ka shnong kaba jngai 20 KM na Amlarem haka 15 bad 16 tarik une u bnai.

Ka Sorkar ka dei ban phai khmat sha Rilum Jaiñtia namar ka don kyrhai ki nongïalehkai bad ka dei ban sdang ban tei jaka ïalehkai bad ki madan ïalehkai khnang ban nym lehnohei ki sap ki phong jong ki khynnah bad samla.

Une u nongïalam ka JSU ula ong ba kila dep ai dorkhat sha u Myntri Ka Tnad Sports ka Jylla ban dawa sports complex ha Rilum Jaiñtia, hynrei haduh mynta kam pat don kino kino ki dak ki shin bad kin ïai bteng ban pynsngew sha ki skhor jong ka sorkar.

Ula kren bynñiaw ruh halor ka jingleh klet ka sorkar MDA bad ka MUA ruh kumjuh kiba khlem kynthup lang ïaka Rilum Jaiñtia ban pynlong ïaka National Games 2022.

Ha kane ka football shnong ka Amkoi la wan ban ïashimbynta da ki klob bapher bapher na Amlarem Sub-Division.

Kiwei kiwei kiba kren ki kynthup ïa u President ka Amkoi Sports Club u Ma Dit Lamin bad u Secretary Teibor Pohlong ha ryngkat y Secretary Shnong u Bar Pohti.