Ka kam lute ba har rukom kiba lam sha ka jngkiew dor ki mar ki mata, dawa pynshitom u bah Ardent

Syllad | The Rising MeghalayaSeptember 22, 2023

U MLA ka Seng VPP na Nongkrem u Bah Ardent Miller Basaiawmoit haka sngi Thohdieng u la dawa ban pynshitom pyrshah ia kiba donkti ha ki kam lute (extortion) lyngba kiba bun rukom kiba lam sha ka jingkiew dor jong ki mar ki mata kiba kongsan (essential commodities) ha ka jylla.

Haba buh jingkylli hapoh ka iingdorbar Assembly u Bah Ardent u la ong ba ka jngkiew dor jong ki mar ki mata kiba kongsan ka dei ka mat kaba khia shibun kaba la ktah jur haduh katta katta ia ki riew paidbah.

 “Jan man la ka taiew, ka la don ka jingkiew dor jong ki mar ki mata kiba kongsan bad ka daw ba kongsan jong kane ka jingkiew dor ka dei namar ki kam lute kiba bun rukom kiba la jia ha ka jylla. Kumta ruh kine ki nongkhaii khnang ban khyllie ki la hap ban kyntiew ia ki dor ki mur jong ki mar kiba kongsan,” u la ong.

Haba jubab ia kane, u Myntri ba khmih ia ka Tnat Food Civil Supplies & Consumer Affairs Comingone, u Bah Ymbon u la ong ba ka mat kaba iadei bad ka jingkiewdor jong ki mar ki mata kam dei satia tang hapoh kane ka jylla hynrei ka dei kaba la sakhi  ha baroh kawei ka ri India.

Ula ong ba ha ka jingsngewthuh ka jong u ka jingduna ha ka jingpynmih mar bam, ka jingkiew dor jong ka umphniang petrol, ki jingkylla ha ka jinglong jingman ka suinbneng ne climate change, ka jingbym ioh slap thikna bad kiwei pat ki long ki dawbah kiba lam sha kane ka jingkiew dor jong ki mar ki mata.

Nalor kata u la pyntip ruh ba ka jylla ka don ia ki district vigilant committee ki ban khmih halor ka jingkiew dor jong ki mar ki mata bad dei na kata ka daw na ka liang ka tnat ka la pyndonkam da ka mobile app bad GPS ban tip ia ki dor ki mur jong ki mar kiba kongsan khamtam ha ki laitylli ki jaka iew ba kham heh, kata kum ha Iewduh, Laitumkhrah bad Rynjah.

Ha kaba iadei bad ka jingsngewkhia ba la wanrah da u MLA ka UDP Sohiong, u Bah Synshar Kupar Roy Lyngdoh ha kaba iadei bad u khaw plastik, na ka liang u Bah Ymbon ula ong ba ki nongshong shnong ka jylla kim don jingtip bha ha kaba iadei bad ki kynja vitamin ba la khleh lang ha u khaw bad ong ba u dei u khaw plastik.

“Watla katta u la ong, lada ki don ki briew kiba ioh pdiang ia u khaw plastik sngewbha ong ia ki ba kin leit ujor sha ka tnat treikam ka jong ngi,” u la ong shuh shuh.

Kham hashwa, une u Myntri u la pyntip ba ka sorkar ka la shim ia ki sienjam ban khmih bniah ba shimkhia ha kaba iadei bad ka jingkiew dor jong ki mar ki mata.

Na ka liang ka tnat na ka por sha ka por ka la bthah ia ki districts/sub-division na ka bynta ban pynlong ia ki jingkhynra ba khah khah khnang ban khanglad ia ki jinglumthup bad ia ka jingpyniaid iew beain ia ki mar ki mata bad ruh ban pynjur ia ki lad jingpynshitom bad rai pynrem bad ban aiti ruh ia ka kaiphot kaba mih lyngba kine ki jingkhynra.

“La shim ia ki lad jingpynshitom pyrshah ia ki kam beain hapoh ki kyndon Essential Commodities Act, 1955 bad  Prevention of Black Marketing and Maintenance of Supplies of Essential Commodities Act, 1980,” ula ong shuh shuh.

Shuh shuh u la ong ba la bthah ia baroh ki deputy commissioner bad sub-divisional officer ban thaw ia k district bad sub-division vigilance monitoring committee khnang ban lah ban tehlakam ia ka jinglum thup bad ka jingpyniaid iew beain ia ki mar ki mata ba kongsan.