Ka kam rep Slasha ka ai jingmyntoi ha kiba bun ki liang; ong ka Director Horticulture haka jingiatai ban kyntiew iaka kam pyniaid iew
Ka kam rep Slasha ka ai shibun bah ki jingmyntoi ia ki nongrep, ka imlang sahlang, ka mei mariang, ka ioh ka kot bad ha ka liang ka ai kam ai jam, ong ka Kong DC Sohtun, M.A.S, Director, Horticulture haba kren kum ka Kongsan ha ka jingialang iamir jingmut halor ka mat “Enhancing Market Access & Quality Production for Small Tea Growers in Meghalaya,” kaba la long ha ka 31 tarik Jymmang ha Integrated Agricultural Training Centre ha Upper Shillong,
Ha kane ka prokram ba la pynlong da ka Directorate of Horticulture, Meghalaya, la ia don lang ruh ka Mary Q. Ch. Marak, Assistant Director, Horticulture (PS&C), Bah Marbakynsai Marbaniang, M.A.S., Assistant Director, Agriculture, I/C Tea Development Centre, Umsning, Bah ML Suiam, M.A.S., OSD, Directorate of Food Processing, u Ramen Lal Baishya, Assistant Director, Tea Board of India kynthup ia ki riew shemphang bad ki ophisar kiba don bynta ha kaba trei borbah ban kyntiew ia ka kam rep Slasha hapoh kane ka than.
![](https://www.syllad.com/wp-content/uploads/2024/09/JIT-Vacancy-823x1024.avif)
Ka jingwan iashim bynta da u John Taylor, Marketing Manager HTPC, Nepal, u Sourav Bhagawati napoh Tea Tech, Guwahati, Assam bad u Parveez Arshad Hussain, Tea Sommelier na Darjeeling ka la nang pynioh mynsiem shuh shuh ha kane ka jingiamir jingmut ban kyntiew ia ka kam rep Slasha.
Ha ka jingkren ka Kong Sohtun Director ka la iai ban ruh halor ka jingdonkam ban phaikhmat sha ka iew ka hat bad halor ka jinglah ban pynmih ia ka mar kaba bha hapdeng ki nongrep Slasha kiba rit ka Mghalaya na ka bynta ka jingmyntoi jong ka Jylla. Ka ong ba ia u Slasha ha kane ka jylla u dei uba lah ban khring shibun namar ka jingbym pyndonkam dawai.
![](https://www.syllad.com/wp-content/uploads/2024/06/Meghalaya-Tea-Grower-jpg.webp)
Na ka liang u Bah ML Suiam ha ka jingkren u la kdew ba ka Meghalaya ka la sakhi halor ka jingkiew ha kane ka kam rep Slasha naduh kine ki laiphew bad sawphew snem ba la dep.U Bah Suaim u la kdew ruh halor ki sienjam kiba thmu ban lah ban pynmih ia ki mar kiba bha, hynrei u la kubur halor kiba bun ki jingeh, kata kum ka jingduna jong ki iew bad ka jingbha jong u mar ba la pynmih.
Na ka liang u Bah Marbakynsai Marbaniang, M.A.S., ADA I/C Tea Development Centre, Umsning, u la ai ka jingbatai kaba bniah halor ki jingeh kiba ki nongrep slasha ki iakynduh ha Meghalaya.
Lah ban kdew ba haba ianujor bad kiwei pat ki Jylla, ka Meghalaya ka don tang 2768 hectare ki jaka rep slasha.Ia ka karkhana slasha kaba nyngkong ha Meghalaya la wanrah ha u snem 1997 (Arengh Tea Industry). Mynta ki don kumba 12 tylli ki karkhana slasha kiba rit bad ba heh.
![](https://www.syllad.com/wp-content/uploads/2024/06/Small-Tea-Grower-jpg.webp)
Leave a Reply