Ka kam ri dohkha ka lad kamai jakpoh: Coming One Ymbon

Syllad | The Rising MeghalayaJuly 16, 2019

JOWAI: U Ma Coming One Ymbon, Myntri ka tnad Fisheries ula ong ba ka kam ri dohkha ka dei kawei na ki lad kamai jakpoh bad ula pynshlur ïaki nongri dohkha kumjuh ruh ïa kiwei ki bym pat sdang ïa ka kam ri dohkha ban phaikhmat sha kane ka kam namar ba ka dohkha kadei ka jingbam ne ka doh kaba baroh ki thied bad kmen ban bam ba ka ïarap ban tei ïaka jingdonkam ban tei ïaka bor met u briew.

U Coming ula ong “Ka tnad Fisheries kala pyrkhat thymmai kumno ban pynmih bun ka dohkha ha jylla khnang ban pynbiang ïaka jingdawa dohkha jong u nongshong shnong.”

U ma Coming dalade ula hiar sha East bad West Jaiñtia Hills ban jurip ïaki jaka ri dohkha ka tnad bad jong ki riew shimet bad ula lap bad ïohi ba ka don ka jingkyrmen ba ki nongri dohkha ka Jylla ki lah ban pynbiang ïaka jingdawa dohkha ha Jylla bad ban nym shaniah shuh na kiwei kiwei ki jylla.

U Myntri ka tnad Fisheries ula lum ïaki ophisar ka tnad Fisheries jong ki ar District ban ïa phylliew jingmut bad ban jur ïaki ophisar ban pynpoi hok ïaka jingmyntoi sha u paidbah khnang ba kan khring u paidbah ban ri dohkha.

Ha kane ka jingleit jurip u Myntri ula kyntu ïaki ophisar ban ai ka jingshakri ka pura ïa u paidbah bad ban don ka jingiajan bad ki nongri dohkha khnang ba ka thong jong ka sorkar kan urlong. Nalor kata ula kyntu iaki ophisar ban shim jingkhein ïaka jingsam symbai dohkha bad ka rukom pynmih bad ban bishar bin bin haba pynioh lad jingirap sha ki paidbah khamtam haba shna pung dohkha khnang ba ka pisa sorkar kan nym lehnohei.

“Lada ki ophisar bad ki paid nongri dohkha ki iatreilang khlem pep ka kam ri dohkha ha ka jylla kan long kaba jop bad ngim donkam ban shaniah dohkha na kiwei kiwei ki jylla,” la ong u Ma Coming haka jinghiar sha ki ar district ka Rilum Jaiñtia haka sngi Nyngkong bad sngi Ba Ar.

Haka jingialang ha baroh ar district la ïadonlang ki Deputy Commissioner, BDO, Director ka Fisheries bad ki Ophisar ka tnad Fisheries haki ar district.