Ka khlam COVID-19 ka hikai ia u briew ban tyngkai ia baroh ki jingthaw ba im ong u Pastor HH Mohrmen

Syllad | The Rising MeghalayaSeptember 18, 2020

U Pastor HH Mohrmen ula ong ba ka khlam COVID-19 ka ai jinghikai ia u briew ban tyngkai bad ban pynneh pynsah ia baroh ki jingthaw ba im ka pyrthei.

“Baroh ki jingthaw ba im naduh u briew haduh u mrad ki long kawei bad u briew uba long u jingthaw ba kyrpang um dei ban ktah iaka jaka shong jaka sah ki mrad, khnang ba ka jingpang kaba don ne kit ki mrad kan nym iabit sha u khun bynriew,” la ong u Pastor HH Mohrmen haba sam iaka khubor lyngkhuh snem ba 133 ka Balang Unitarian ha Jowai haka sngi Thohdieng.

Shuwa ban sdang ka jingiaseng iasyllok, la don ka jingbuh syntiew ha u mot dur u nongseng ka Balang Unitarian, Jowai U Babu Hajom Kissor Singh da u Emmuhot Niangti bad pynher iaka lama da u Marki Passah, Chairman ka Balang.

Kum ka dak ban burom ia kiba don bynta ban iakhun pyrshah haka khlam COVID-19, ka Balang Unitarian kala pynkup burom ruh ïa u president jong ka Synjuk ki Waheh Shnong Jowai u ma Alan Niangti bad ia u ma Edystone Shylla, Waheh Shnong ka Dorbar Shnong Tympang, Iawmusiang.

“Ka khlam COVID-19 kaba pur na u khniang jingpang coronavirus kadei ka sakhi ia kata ka jingshisha jong ka jingbym don jingiapher ymtang hapdeng ki para briew, hynrei wat ki jingthaw ruh. Phi i une u khniang jingpang u dei uta u nuksa jong kata ka jingshisha namar ba um iohi satia iaka jingiapher hapdeng u briew bad u mrad.

Kumba ngi iatiplang ba u khniang corona virus udei u khniang jingpang ba ju shong ha ki mrad, hynrei u kynthih pat sha u briew ban thaw jingpang haka met jong u ne ka briew ba u shong. Hynrei ymtang ka COVID-19 kaba la ngeit ba ka mih naka Lymbit, ka Middle East Respiratory Syndrome (MERS) ka pur lyngba ka Ud kumjuh ka Severe Acute Respiratory Syndrome (SARS) kaba pur lyngba u Kui (civet) ruh kidei ki jingpang kiba mih na ki mrad bad thaw jingpang ynda ula kynthih bad shong ha ka met jong u briew,” la ong shuh shuh u pastor Mohrmen.

U Pastor HH Mohrmen ula ong ba ka pyrthei kala shah pyndik daka khlam COVID-19 kaba la pur sted kylleng bad ktah iaka pyrthei baroh kawei. Ki khanatang ki iathuh ia ngi bad hadien jong kano kano ka jingjia kaba phylla kaba ktah ia uba bun balang, kata ka jingjia ka ieh iaki dak mong kiba sah khliang bad kiba iaineh. Kata ka jingjia ka lah ban wanrah iaka jingkylla ymtang haka rukom pyrkhat hynrei wat haka rukom im u khun bynriew ruh. Ki jingjia kiba kum kine ki pynlong ia u khun bynriew ba un twad jingmut, duriap, bad sdang iaka rukom pyrkhat bad ka rukom im kaba thymmai. Haka jingshisha kadei ka jingdawa hi jong kata por ba u bynriew un sdang ka jingim kaba thymmai nadien kata ka jingjia. Kane ka dei kata kaba ngi iakren mynta bad kaba ngi khot kata ka ‘new normal. Namar para mynsiem, ki jingjia kiba kum kine ki don shibun kiei kiei ban hikai ia ngi.

“Ngi ki bynriew baroh ngi long khun U Blei, ki mynsiem shipara shynrang bad kynthei kadei ka phangpdeng jong ka jingpyndon burom Anniversary ha kane ka snem, hynrei ka jingkylli ka long hato tang u/ka bynriew ki long uba kordor hakhmat U Blei?  Ka hok longbriew manbriew ne Human rights kadei kaba la pynshong nongrim ha kata ka ‘dignity of life’ ne ka jingngeit ba kawei pa kawei ka jingim ka long kaba kordor bad kata kadei ka nongrim bashisha jong ka jingim. Ha ka shikyntien ngi lah ban ong ba ka jingmut jong kane ka ktien ka long ba u bynriew baroh u long katjuh ne kumjuh. Kane ka la hap kumba ong ka matpdeng jong kane ka jingiaseng, ba ‘U bynriew baroh u long khun U Blei’. Ka jingiohi ba u khun bynriew baroh kidei kiba iaryngkat kyrdan, kadei ka jingsngewthuh iaka jinglong kawei jong u bynriew baroh. Hynrei ka jingsngewthuh baka pyrthei ba iar ka long kawei, kadei ka jingsngewthuh kaba jylliew bad kaba kynja mynsiem.” Ula ong u pastor Mohrmen.

Ia kane ka jingiaseng lyngkhuh snem ka Balang Unitarian la pynlong da kaba bud ryntih iaki kyndon ba la bthah ka sorkar ban iada na ka khlam COVID-19. Ka Balang kala pyllait paidbah iaka jingiaseng da ka ‘Live Streaming’ lyngba ka Youtube Channel jong ka balang bad lyngba ka facebook page https://www.facebook.com/SylladOfficial jong u syllad.com

Ha ka por janmiet hashuwa ban pynlong ia jingiaseng ai khublei iaki nongseng ka Balang ka don ka jingthang sharak ha phyllaw jong ka iing mane bad iingmane kaba la shimbynta daki seng samla ka Balang.