Ka kong Ampareen lehse ka la shah banbor ha ka BJP, CBI: Pala

Syllad | The Rising MeghalayaMarch 26, 2024

U nongialam ka Seng Congress uba dei ruh u MP ka Shillong u Bah Vincent H Pala u la kynnoh ba ka kyrtong jong ka National People’s Party (NPP) ka Kong Ampareen Lyngdoh lehse ka la ngat ha ka jingshah banbor ha ka BJP bad ka Tnat Central Bureau of Investigation (CBI).

Haba kren sha ki lad pathai khubor hadien ba la pyndep ia ka jingthep kyrteng na ka bynta  ka ilekshon Lok Sabha ka ban wan haka 26 tarik Lber, u Bah Pala u la ong, ha ka jingshisha kam long kaba dei ia u ba un kynthoh pyrshah ia kiwei pat ki kyrtong tang namar ba ki la pynmih ia kiba bun ki jingkynthoh pyrshah ia u.

Dang shen ka Kong Ampareen ka la pynpaw ba ka la tip bha ha kaba iadei bad ka madan ialehkai jong ka Congress bad ka long kaba kloi ban pynshong noh ia u Bah Pala ha kane ka Lok Sabha ilekshon ka ban long ha une u bnai u ban wan.

Hynrei, na ka liang u Pala u la ong ba ka Ampareen ka la iarap ban ialap na ka bynta jong u ha ki laitylli ki samoi ilekshon kiba la dep. U la ong ruh, “Ka la iarap ban leit ialap sha baroh ki jaka hapoh Khasi -Jaintia, bad ka la pyrto shibun ia Nga ha kine ki ilekshon kiba la leit noh.”

“Mynta hadien ba ka la iehnoh ia kata ka liang, Nga tharai ka CBI ka la pynbor ia ka ba kan ong ei ei lane ka BJP ka la pynbor ia ka ban ong ei ei, Hynrei, Ngan ym ong ei ei hynrei ka la iarap shibun ia nga, ka long ka briew kaba bha na ka bynta jong nga,” ong u Bah Pala.

“Ngam kwah haba don kino kino kiba dang don hapoh ka jingkhmih ka CBI, haba kino kino ki don shibun kiei kiei, ki lah ban hap kren wat ia kaei kaba kim shym la thmu satia ruh. Phi tip ba hateng phi mut ia kaei kaba phim kwah bad hateng phi kren ia kaei kaba phim shym la mut ne thmu. Ngam kwah ban jubab ne ong ei ei halor kane ka mat,” ong shuh shuh u Bah Pala.

Halor ka jingkynnoh ba u long jemnud na ka bynta ka NPP, u Pala u la ong, “Nga long jemnud na ka bynta baroh ki party. Nga tharai kam long kaba eh ban long jemnud na ka bynta ban jop ha ka ilekshon, ka dei halor kumno ba ki paidbah ki shaniah ia phi. Nga shim ia ka kam sain hima ne politics kum ka politics bad ka jinglong paralok kum ka jinglong paralok bad ka jingiadei shimet ka dei kaei kaei kaba kham pher.”

Shuh shuh u Pala u la ong ruh, “Nga tharai ym dei ba Nga long jemnud na ka bynta kino kino ki party, hynrei Nga tharai ba kum ka Jylla kaba rit bad ki nongshong shnong kiba khyndiat, ngi dei ban iatreilang na ka bynta ka jingmyntoi jong ki paidbah bad ym na ka bynta ki jingmyntoi shimet, kumta ka jingkylli kaba iadei bad ka jinglong jemnud ne ka jinglong ba eh kam don satia.”