Ka kot shaphang U Kiang Nangbah kaba kampher na kiwei ki kot shaphang jong u

Syllad | The Rising MeghalayaDecember 28, 2022

U nongthoh ka kot “U Kiang Nangbah: The Swordsman with the Stealth of the Tiger” kaba la thoh da u Dr. HH Mohrmen ka dei kaba la sot na ki jingthoh ki shipai phareng bad ki khana kiba la iathuh da ki riewtymmen na ki por sha ki por.

Ia kane ka kot la pyllait paidbah haka 17 tarik u Nohprah 2022 haka sngi pyndonburom ïaka jingdap 50 snem ka jingiaid lynti ka ka Jaintia Students’ Union.

U nongthoh Dr HH Mohrmen ula kam bad kane ka kot shaphang U Kiang Nangbah, u nongialeh laitluid ka khampher na kiwei pat ki kot bala pynmih shaphang jong u. U nongthoh ula ong ia kane ka kot la pynwan dur da kaba sot na ka jingthoh jong ki shipai phareng bad ha kajuh ka por la shim ruh na ki parom kiba ki tymmen ki san ki ïathuhkhana (oral narrative) na ki por sha ki por.

Ki tyllong kiba u nongthoh u pyndonkam ha kaba thoh ïa kane ka kot ki dei lyngba ki shithi bad ki jingphah khubor ki shipai phareng kiba don ha kine ki lum bad ki heh shipai kiba don ha Calcutta bad Delhi ha kata ka por, la ong u Dr Mohrmen.

Pule | Mano bad hangno la kem ia U Kiang Nangbah?

U Dr Mohrmen ula ong ba ula tih tynrai naduh ka tynrai une u khlawait, ka jaka kaba u sah bad haduh ka jaka kaba la phasi ïa u. Haba ïadei bad ka jingïaleh kaba la ïalam da U Kiang la lap ba kam dei kaba suk ïaka sorkar phareng ba kan pyndem ïa U Kiang.

Ula iathuh ba ka sorkar kala pyndonkam da ki syiem jong ki hima ba marjan bad kumjuh ruh wat da ki kur jong u syiem Jaintia kiba wan kiew na ri thor ban pyrshang ban pynbor ïa U Kiang ba un pyndem ha ka sorkar nongwei.

Ula ong ba ka sorkar phareng kala pyrshang har rukom ki jingpyrshang ban kem ia U Kiang Nangbah, ka phah pynkiew da ki hajar ngut ki shipai phareng sha kine ki lum ba ïaleh pyrshah ïa ki paid jong U Kiang Nangbah. Nalor ki shipai ka phah ruh ïa ki ryngkat bad ki suloi bad ki tup rit ruh kiba ki pynkiew sha ki lum Jaintia ban ïaleh pyrshah ïa ki nongïaleh laitluid hapoh ka jingïalam jong U Kiang.

U Dr Mohrmen ula ong ba ki don shibun ki jingtip kiba thymmai shaphang ka jingïaleh ki Pnar pyrshah ïa ki phareng ha kane ka kot. Kane ka kot ka long ka thup jingtip shaphang ka jingïaleh jong ki Pnar pyrshah ïa ki shipai phareng kaba kut noh da ka shah shet kylla bad shah sdien phasi u nongïalam ki paid ïaleh ki Pnar U Kiang Nangbah.

Mano bad hangno la kem ia U Kiang Nangbah?

Ïa kane ka kot la thoh ha ka ktien phareng bad u nongthoh u kyrmen ba kan iarap ym tang ia ngi ki trai ri trai muluk, hynrei kiwei ruh ki jaidbynriew haka ri bad ka pyrthei kin tip shaphang jong U Kiang Nangbah. Mynta u snem ka dei lyngkhuh sngi ïap ba 160 snem U Kiang Nangbah u nongialehluid ka Ri Pnar uba la shah rai pynrem haka sorkar phareng da kaba sdien phasi ha Iawmusiang.

Kane ka kot ka don 150 sla bad ka dor jong ka ka long tang T.250/-.