Ka kot “U Kynjri Ka Jingtim” kaba iarap iaki longïing kiba tyngkhuh iaka pop ka jingtim

Syllad | The Rising MeghalayaJanuary 20, 2025

Ha ka jingialang kaba rit bad kaba ishongkun, u Pastor S.I. Ïawphniaw Senior Pastor KJP Synod Sepngi uba long ruh u kum u kongsan, u la pyllait paidbah sa kawei pat ka kot ba la thoh da u Bah HT Wells Sten kaba kyrteng “U Kynjri ka Jingtim” (Dkhat ia u Kynjri jong ka) ha conference room ka KJP Synod Sepngi ha Mission Compound Shillong mynta ka sngi Palei 16.01.2025.

U Pastor Ïawphniaw u la ñiewtang ia u synñiang ba u nongthoh u la kynshew ha ka thoh ka tar jong ka jaidbynriew bad u la ong ruh ba kane ka kot ka long kaba iadei eh bad kane ka juk ha kaba ki jingtim jong u bymman ki wan laiphewjait ha ki briew.

U la iaroh ruh ia ka rukom buh kyntien jong u nongthoh ha man la ki kot ba u thoh, da ki kyntien bad ki kyrteng kiba pynkhih ia ki jingmut jingpyrkhat jong ki nongpule. U la ong, ba dei tang kiba wad ia ka bor jong U Blei kiba lah ban dkhat ia u kynjri jong ka jingtim, namar da lade phim lah. U Kyntu ia ki nongpule ba kim dei ban duh copy ia kane ka kot kaba iarap ia ki longiing kiba shem bad kiba tyngkhuh ia ka pop ka jingtim ha ka dur jong ka jingpang khyllah, jingiap accident bad kiwei.

Ha kawei pat ka liang, u Pastor NWP Warjri uba long u symbud kongsan u la iathuh ba la ithuh ia u Nongthoh jong kane ka Kot naduh ba dangrit, kumno u wan na ka longiing longsem kaba donburom bad kaba riewblei. U la iathuh kumno ba u la wad admission ia u hapoh St Edmund’s College ban long uwei u khlur bapaw jong ka College, khamtam ha sap ka talent ban thoh ban tar. Utei u Pastor u la iathuh ruh ba u Bah HT Wells ym tang ba u thoh ia ki kot niam ba kynja mynsiem hynrei u dei uwei na ki nongthoh columnist batbit jong kane ka juk, u bym ju salia ban pynieng ñiuhmat ia ki nongpule la ka dei ia kino kino ki subject. Te katno tam haba u la thoh haduh 5 tylli ki kot ban iarap ia ki mynsiem bakordor jong ka Ri bad ka Jaidbynriew.

Ha ka jingkren, U Bah HT Wells Sten, u la iathuh balei ba la pynmih sa ia kane kawei pat ka kot hadien kato ka kot ba la pyllait paidbah da u Dr Ricky AJ Syngkon ha u bnai Naitung jong kane ka snem ba la dep, ka daw ka long ba u iohi ba bun bah ki briew ki iatyngkhuh mawsiang ia ka pop ka jingtim kaba hiar pateng na ki longshwa manshwa ha ki pateng balui lui bym tip ei ei ia ka duh ka dang jong ka. Ki kylla long ki langkñia balui lui jong ka jingtim. U la ithuh ruh kumno ba u iakynduh ha khohsiew lajong halor ka jingkhlad accident kali u kynum trai jong i ha ka snem 2011 bad ka jingkhlad na ka jingshah lympat electric ka para kynsi jong u dangshen ha une u bnai Risaw jong kane ka snem ba la dep, katba i dangkhreh ban sum ialade. Kitei ki jingjia la ong u Bah Wells ki dei ki shiah bathar ia ka jingim jong u ban kylli balei kane ka jia bad ka jia ha ki balui lui?

U Bah Wells u iathuh ba dei hadien ka jingduwai bad jingwadbniah ba u sngewthuh ba pleng ka pop jong ka Jingtim kaba wan la ki longshwa manshwa ka hiar ha kine ki pateng, naba U Blei u isih ia ka jingleh pop lehsang jong ki briew, uba ong ha ka Bible “naba nga long u Blei uba thut shen uba pynhiar ia ka jingpalat jong u Kpa ha ki khun bad kiba lai bad sawpateng bynriew kiba isih ianga”. Kumta, u Bah Wells u iathuh ba kane ka kot ka don lut ha ka kumno ban lait na u Kynjri jong ka Jingtim.

Hashwa ia kane u Bah Wells u kren bynniaw ba la hiar palat ka jingkwah jong ki briew ban pule kot. Kim bang shuh, kane ka la pynnoh mynsiem ia ki nongthoh namar ym don jingmih ei ei, hynrei ma u pat u shim ia ka kum ka mission ba shakri wat la ym don jingmih ei ei ruh ka biang.

La pyniaid ia ka jingialang da u Tymmen Basan Justborne S Cajee bad ia kane ka kot lah ban ïoh na baroh ki dukan diekot ha nongbah Shillong ha ka dor T. 100 kawei.