Ka kyrwoh kitbok Behdieňkhlam

Syllad | The Rising MeghalayaJuly 6, 2023

Ka Seng Khasi Kmie, ka shim ïa kane ka kabu ba kan ai ïa u kyrwoh kitbok  ïa ka lehniam Behdieñkhlam, jong ka Seiñraij Jowai, kaban long ha ki “Soo Sngi Lai Ïaw” kata ha ka 6 (Pynsiñ), 7 (Mulong), 8 (Musiang) & 9 (Muchai) jong mynta u Naitung, 2023.

U General Secretary Seng Khasi Kmie Rgh Hainess Marbaniang ula ong ba ka Seng ka ai khublei kyrpang ïa baroh ki parakur parakha khamtam ia ki “khon ka Niamtre jong ka Seiñ Raij Jowai”. Ai ba kane ka lehniam ba shisien shi snem, kan da long kaba phuh ba phieng, ba shongkun shong Blei, ha kaba u “U Tre-Kirot Kynrad, ki Blai ki Syiem” kin hiar ka kyrkhu Blei ki ban dap miar da ka jingsuk, jingkmen, jingpalei bad ba dap da ka jingieit, ha ka juh ka por ba Un ïai ri un ïai sumar sukher kyndong bad ban pynthiah pyndem sharud sha kiar ïa ka khlam ka ngoh.

Ula ong ruh b aka seng ka buh ruh ka kyrpad ka kyrpon ba U Blei Trai Kynrad, un theh sei ïa la ka kyrkhu ka kyrdoh da ka roi ka par parum pareh, ka aibuit aibor ïa u khun bynriew ba  un im sngi ban im ka jingim ban kamai ïa ka hok, ban lait na ka klip ka klop, ka tuh ka thiem, ka sniew ka smeh baroh ha ka imlang sahlang.

Ka Seng ha kum kane ka kynti, ka ïai don ryngkat ruh bad ki nongïalam jong ka Seiraij Jowai, Seiñ Raij Niamtre Shillong bad khamtam eh bad u Pa Dolloi ka Elaka Jowai, ki Langdoh bad ki Pator bad baroh ba kin ïoh ïa ka shembuit ka shem bor ban lah ha ka ban pyndep lut ïa baroh ki kam ki jam kiba dei kyrpang na ka bynta ka Niam  Behdieñkhlam mynta u snem.