Ka la don ka jingkyntu ban pyniar ia ka VPP ha Rilum Garo hynrei ngin ym kyrkieh; ong u Bah Ardent
U nongialam ka Seng Voice of the People Party (VPP) u Bah Ardent Miller Basaiawmoit ha ka 23 tarik mynta u bnai u la pynpaw ba ka la don ka jingkyntu na na ki briew na Ri Lum Garo ban pyniar noh ia kane ka party ha ka thain ka jong ki kumjuh ruh wat na kiwei pat ki nongialam na ki jylla jong ka thain Shatei Lammihngi (North East) jong ka ri.
Haba kren sha ki lad pathai khubor shabar jong ka jingialang hapoh ka constituency ka jong u ha Nongkrem, u Bah Ardent u la ong ki la don ruh kiba la kyntu wat ban ia aireng ha kane ka elekshon shiteng samoi (bye-election) ka ban wan na Gambegre ha Garo Hills.
![](https://www.syllad.com/wp-content/uploads/2024/09/JIT-Vacancy-823x1024.avif)
Kumba ka long mynta u la ong ba ki la sdang ban pynkhreh ban bsuh khlieh hapoh Rilum Garo namar ki la don ki briew kiba pynpaw ia ka jingsngewtynnad bad ka jingdon mon wat ban iakhun na ka tiket VPP napoh Gambegre bye election, hynrei na ka liang ka party ka la rai ban ym shim rai kyrkieh halor kane ka bynta lada ka kwah ban ioh ia ka jingkyrshan kaba pura na ki nongshong shnong ka Rilum Garo.
Da kaba pynpaw ba shen ka party kan pynlong ia ka jingiamir ha Rilum Garo, une u president ka VPP u la ong “Ha ka jingshisha Nga la don ia ka jingthmu ban leit sha Rilum Garo hapoh jong une u bnai, hynrei namar ki kam kiba kyrkieh nga la hap ban don hangne.”
Haba kylli, u Bah Ardent u la ong, “Ha kaba iadei bad ka elekshon sha ka GHADC, ngim pat lah ban ong ei ei mynta namar kan shong ha jingdon por ka jong ngi. Lada ngi don ia ka por kaba biang ngin leit sha Rilum Garo. “Hynrei kumba ka long mynta, ngi la shim ia ka rai ban pynleit jingmut kham bniah sha ka elekshon Assembly jong u 2028, hynrei ngim lah pat ban ong kumno kan lam ha kine ki sngi ki ban wan,” u la bynrap.
Nalor kata une u nongialam ka VPP u la kam ruh ba kiba bun ki nongialam sain pyrthei na kylleng ka thain North East ki la pynpaw ia ka jingdon mon ban pyniasoh bad ka party namar ki rukom pyrkhat kam bad ki nongrim jong ka kum ka party sain pyrthei.
“Ki nongialam napoh Tripura, ZPM, Mizoram ruh ki la iakynduh ia ngi. U General Secretary jong ngi u la iakynduh ruh ia ki nongialam napoh Assam kiba dei ki trai shnong riewlum namar ka don ka jingsngewkhia bad ka jingdonkam ban ieng iatylli kawei ban don ia ka nongrim bad ka jingkut jingmut kaba khlain ban aijingiada ia ki trai shnong riewlum jong ka thain North East,” u la bynrap.
Nalor kata haba kylli, une u nongialam ka VPP u la ong, “Ngi la pynpaw ha ka por ba Nga leit ban iashim bynta sha ka jingialang jingpyntian smai ia u MP jong ngi sha kiwei ki nongialam jong ki jylla bapher bapher ba ngi dei ban don ia ka jingiasngewthuh jingmut kum ki nongialam napoh ka thain khamtam haba ki kam kiba iadei na ka bynta ka bha ka miat ka jong ngi ki iatyngkhuh bad ki ain ka sorkar Pdeng. Kumta ka VPP kan pyrshang ban iamir jingmut lang bad ki nongialam sain pyrthei na ki jylla bapher bapher jong ka thain North East.”
Leave a Reply