Ka Ladthadlaboh ka jaka pyni paid ki kyrtong ka Jowai

Syllad | The Rising MeghalayaJanuary 30, 2023

Wat hadien ba kiba bun ki dorbar shnong ha Jowai Constituency ha kane ka kynti kila pynbna bad buh iaki kyndon shnong kiba pyrkhing iaki kyrtong ban ialap election ha Jowai, hynrei ka jingpynbna kaba la pyllait da ka dorbar shnong Ladthadlaboh kam la shym la teh kyndon iaki kyrtong ne candidate ban wan ialap elekshon kumjuh ruh ban wan ialam iaki nongkyrshan jong ki kyrtong ban wan sha ki jingialang paidbah ka ban long haka shnong Ladthadlaboh.

Ka jingbym pyrkhing ka Ladthadlaboh Dorbar Shnong iaki kyrtong kan long ka kabu bad kan plie lad iaki kyrtong ban pyni iaki paid ki phlang jong ki, kumba long haki elekshon kiba la dep.

U Waheh Shnong Lathadlaboh u ma ABM Shullai haka jingpynbna kaba la pyllait ula kyntu iaki candidate bad ki party bapher bapher ban bud ryntih iaki kyndon jong ka Model Code of Conduct jong ka Election Commission of India (ECI).

Ula ong ba ka dorbar shnong kala rai ba ka jingialang paidbah jong ki kyrtong na ki party bapher bapher ha Ladthadlaboh yn pyniaid da u waheh shnong haka jingiadonlang ki dkhot ka executive committee jong ka shnong.

Ka jingiaid lynti ka Jowai Constituency, hato ka history kaba rim kan wan jia biang?

Shuh shuh ka dorbar shnong kala ong ba ki kyrtong kiba pynlong iaka jingialang la kyntu iaki nongkyrshan, ki nongbud kiba wan sha ka jingialang ialap elekshon ban long ki briew kiba don iaka akor bad ban burom kylliang iwei i iwei bad ban bud ryntih iaki kyndon shnong ban pynlong iaka shnong kaba khuid ba suba bad pynneh iaka shong suk shongsain kumba la buh kyndon ka ECI.

Ka dorbar shnong Ladthadlaboh kala mana ban bret klumar iaki bitor plastic, plastic kwai bad kiwei kiwei kiban pynjakhlia iaka sawdong sawkun ka shnong bad ka madan ialap election.

Ka dorbar shnong kala khang pyrshah ban pyndonkam iaki jingdih ba pynbuaid bad ka maham jur ia kino kino kiba wan sha ka jingialang ban kren iaki kyntien khlem akor bad ban pynklumar shnong.

La khang pyrshah ia kino kino ki kali ban pynheh iaki sur jingrwai napoh kali haki lynti synkieng, ka surok bah kiba hap hapoh u pud u ang ka shnong palat iaka 10 Pm.

Ki party ne u candidate ba pynlong iaka jingialang kin hap ban shim iaka jingkitkhlieh ban pynbeit bad ki pulit pyniaid kali (traffic police) ban lait ka jingkhapngiah bad ban lait pynthud iaka iaid ka ieng ki kali ha surok bah.

Ki party bad ki candidate kin shim ka jingkitkhlieh ban pynkhuid iaka madan ba pynlong iaka jingialang bad ki jaka ieng kali kiba pyndonkam hadien ka jingialang.

Ka dorbar shnong Ladthadlaboh kala khang pyrshah iaki kyrtong ne ki party ban kynnoh kynta ne bein ia kiwei ki party ne Candidate khlem ki sakhi satar kiba biang bad dei ban kren tang iaka nongrim bad ki mat ialap elekshon.

Ka dorbar shnong Ladthadlaboh ka khang pyrshah ia kino kino ki briew la ki trai shnong ne bar shnong ban sam pisa kaba long ruh pyrshah iaka aiñ jong ka Election Commission ka ri India.