Ka Lami Designing & Tailoring Institute ka shlem hikai seng kam iaki kynthei bad shynrang

Syllad | The Rising MeghalayaOctober 2, 2022

Ka Lami Designing & Tailoring Institute kaba don ha Moomon, Mihmyntdu ka dei ka shlem ban ai jinghikai iaki samla ban sengkam bad ban ieng hala ki jong ki kjat.

Kane ka jaka ai jinghikai ban suh jain, kaba la sdang naduh u snem 2021 kadei kaba dei trai da I kong Iaraplang Pakma.

Mynta kane ka shlem kala sdang iaka Production Centre ne ka jaka pynmih iaki jain kaba la deh suh dep thain ha ki dur ba har rukom ki khynnah ba shah hikai pyntbit na kane ka shlem.

Ia kane ka production centre la plie paidbah haka 30 tarik u Nailur u bnai bala dep da u Bah A Malngiang, General Manager District Commerce and Industry Centre.

U Bah Malngiang ula iaroh ia kane ka jaka ai jinghikai kaba la lah syndon ban pynmih iaki mar bad ula iathuh ruh iaki lad ba ka ophis jong u ka lah ban ai jingiarap ram lyngba ka PMEGP bad ki subsidy haba thied iaki kor bad ka jingai jingshakri sha u paidbah.

Ha kane ka sngi la donlang u Lambormi Suchen, Skill Development Officer, Meghalaya State Skill Development Society, u Andrew Shullai MDC Jowai Central, u Precious Ryngkhlem, Waheh Dong Moomon bad kiwei kiwei.

Ka Kong Ïaraplang Pakma kala ïathuh ba ïa kane ka shlem ai jinghikai la seng haka nongrim ban kyntiew ïaka ïoh ka kot khamtam ki samla kynthei da kaba ai jinghikai ïaki ba kin seng kam lajong khnang ba kin lah ban ïeng hala ki jong ki kjat.

Ha kane ka shlem yn hikai ïaki samla 3 haduh 6 bnai kum ka Diploma in Dress Designing, Diploma in Tailoring shi snem, ka Advance Diploma in Tailoring bad Advance Diploma in Fashion Designing ki long 2 snem na bynta ki kynthei bad shynrang.