Ka lawei jong ka Jowai Municipal Board ka sah haka umdum: KL Pariat

Syllad | The Rising MeghalayaAugust 15, 2021

U Ma KL Pariat nongshong shnong jong ka Iawmusiang ula ong ba ka lawei jong ka Jowai Municipal Board (JMB) ka dang sah haka umdum namar ba haduh mynta ka sorkar kam pat lah ban pynthikna la kan pynim ne pyniap noh ia kane ka tnad jong ka Urban Affairs, kaba peit iaka khuid ka suba jong ka Jowai.

Ia kane ula ong hadien ba ula ïoh iaka jubab Right to Information (RTI) kaba ula pan na u PIO jong Jowai Municipal Board.

U ma KL Pariat ula khot da ka jingialang haka sngi Saitjain ha Chilliangraij, Jowai iaki synjuk nongialam shnong ka Jowai, Ri Jaintia bad katto katne ki waheh shnong bad ki nongshong shnong ka Jowai bad ka Jaintia Tribal Traders Association.

Katkum ka RTI kaba ula pan halor ba ka sorkar kala pynduh ne em iaka Jowai Municipal Board bad balei ba ym lah ban jied iaki nongmihkhmat ne ward commissioner ba pura jong ka JMB. Ka kubab kaba ula ioh, ka ong baka sorkar kala don jingthmu ban pynduh noh iaka Jowai Municipal Board katkum ka jingpynbna jong ka tnad Urban Affairs ka sorkar jylla haka  8^th December 2000 bad kane ka jingtyrwa ban pyndam iaka Jowai Municipal Board la phah sha ka JHADC ha u bnai Lber 2000.

Ka JHADC ruh kala jubab ia kane ka jingtyrwa bad pynim biang iaka Jowai Town Committee katkum ka jingiakut da kaba buh kyndon ia ka sorkar Jylla ba kan siew iaka tulop jong ki ophisar, nongtrei bad ka Honorarium jong ki chairman, Vice Chairman bad baroh ki ward commissioner.

Nalor kata ha katei ka shthi la kdew shai baroh ki jingpynlut pynsep kaba kynthup iaka development grant bad ki toll gate jong ka Jowai Municipal ban ai biang sha ka JHADC bad ban shimti biang ka JHADC ia baroh ki tum ki tam jong ka.

Ka JHADC kala ong ruh ba lada kam long katkum ka jingiakut, ym lah satia ban pynim biang iaka Town Committee.

U Ma KL Pariat ula ong ba katkum ka notification ka tnad urban kala pan jingmut ruh na u nongshong shnong ka Jowai ban pynneh ne pynsah iaka Jowai Municipal Board. Ki dong/club bad ki shnong ba mynta kiba ym pdiang iaka Municipal kadei ka Dulong, Loompyrdi Iongpiah, Loomiongkjam,  Khliehmynkrem, katba ka Panaliar kam shai la ka pdiang ne pyrshah iaka JMB.

Ha une u juh u snem 2000 bad 2003 ka Jowai Municipal kala shah ujor mukotduma hadien ba kala thmu ban pynlong iaka jingjied ward commissioner ha Guahati High Court haka Jaintia Hills Tribal Traders Association bad kawei pat ka Misc case ha u snem 2003 kaba la ujor da ka Jowai Civic Awareness Committee.

Kane ka jingpoi ïinglieh iingsaw kane ka kam kala neh bad khlem ioh jingtip pat kaei ka rai jong ka iingbishar.

U Ma KL Pariat ula ong ba ki nongialam kine ki synjuk kiba ujor iaka mukotduma kila khlad bad ka lawei jong ka Jowai Municipal ruh ka sah haka umdum.

Katkum ka jubab RTI ka Municipal Jowai kala dep phiah ia u pud u sam jong ka bad baroh kawei ka Jowai la khein iaka hapoh ka Jowai Municipal Board.

Ki kam ba bteng ka JMB ban trei ki dei tang ka kam jingpynkhuid ñiut ki ñiut na sor Jowai, ka prokram Swachh Bharat Mission (Urban), ka Deendayal Antyodaya Yojna kaba kynthup iaka National urban Livelihood Mission, ban kyrshan iaki nongdie madan (street vendors) Ban ai jinghikai bad jaka trai iaki samla samhoi ban ieng hala ki jong ki kjat bad ka jingai iing ia bym don iing ne ka skim shelter for urban homeless.

Shuh shuh u Ma KL Pariat ula ong ka jubab RTI, ka JMB ka don ka jaka ha Sabahmuswang bad dang pynkhreh iaka DPR bad shna iaka Feacal Sludge & Septage Management (FSSM) ban theh iaki jaboh paiñkhana kiba ka pynkhuid na ki iing briew ban iada iaka Wah Myntdu. Nalor kata ka JMB kala shong pyrkhat ban shna iaka jaka bret ñiut kaba paka, bad ka jaka kaba la rai ban shna kadei haka shnong Samanong katkum ka report jong ka Task Force Committee (Dt 23/03/2021).

Halor kane ka jubab RTI kaba ma KL Pariat ula dep pynsngew sha ki waheh shnong bad ki katto katne ki nongshong shnong bad baroh kila pynpaw ba kane ka kam kadei kaba sahteng bad kin hap ban shong pyrkhat sani bha.