Ka Leh Ñiam Thohlangdoh ha Raij Jwai

Syllad | The Rising MeghalayaMarch 27, 2019

Ka Thoh Langdoh ka dei kawei na ki leh ñiam ne kñia ainguh ai dem jong ka Raij Jwai kaba la leh bad pyndep ha Law Langdoh ka jaka ba don u Moo Langdoh kumta ha kane ka sngi Hat 27 tarik u Lber la sakhi ba ia kane ka lehniam la pyndep da u Sangot Paswet ha ryngkat ka jingiadonlang U Doloi, U Pator, U Langdoh, Ki Sangot, Ki Wasan bad ki Phra Kur-Phra Kmai. Shwa ban poi kane ka sngi ha ka Musiang 23 tarik la don ka ‘Kbai Mooknor’ ha khmat ka ïew ka syiem bad ha ka sngi ba bud pat 26 tarik u Lber, u Doloi, Pator, Langdoh, Sangot, ki Wasan ryngkat bad ki Kñi na ki Phrakur-Phra kmai ki pyndep ia ka lehñiam ‘Dih Soopen’ ha ïing Langdoh.

Kane ka sngi Thooh Langdoh, kat kum ka jinghikai ñiam ki khun ka Ñiamtre latip ia ka ha kawei ka kyntien kum ka sngi ‘Sang Sngi’, ka sngi ha ka ba ki khun ka niamtre ki kiar ban leh ia kiei kiei ki kam kiba wanrah ka jingsniewdur ne ktah ia ka mei mariang bad ka bynta bakhatduh jong kane ka sngi Thoh Langdoh ka dei ka jingthung ia u symbai riewhadem bad symbai sohkhia ha ka kper ba don ha iing Langdoh kaba la tip da kawei ka kyntien kum ka ‘Ka Thung Sang’.

Kum ki pateng ka bri u Hynniewtrep- Hynniewwasa ban tip shaphang kane ka lehniam, ka rukom, dustur ki khun ka ñiamtre hapoh ka Raij Jwai ka long kaei kaei ka khubor ba sngewtynnad bad long ruh ka jingsngew sarong ha khmat ka pyrthei ba ki mynbarim ki longshwa manshwa jongngi ki long ki briew kiba don ka jingkitkhlieh bad iohi jngai ia ka jinglongkyntang bad jinglong kyrpang ka mei mariang ha kaba ki la shim ban pruid dak lypa ia kane ka sngi “Thoh Langdoh ne ka sngi “Sang Sngi”, ha lyndet kane ka rukom hikai ñiam, hato, ha kane ka juk mynta kum ki nongshong shnong ne ki khun ka niamtre hapoh ka Raij Jwai ki da long shisha mo kiba tip bad bna shaphang kane ka sngi bad ruh ki da long shisha mo kita ki briew kiba bud ryntih kat kum ka adong ñiam ba la ioh hikai?