Durand Cup: Ka lympung ialehkai football kaba rim tam ha dewbah Asia kan long ha Shillong

Syllad | The Rising MeghalayaJuly 3, 2024

Ka lympung ialehkai football ba la rim bha ha ka dewbah Asia, ka Durand Cup, kan sdang naduh ka 27 tarik mynta u bnai bad ba kan kut ha ka 31 tarik u Nailar.

Ka khubor ba sngewtynnad ka long ba ha kane ka kynti ka nongbah Shillong ka la ioh lem ia ka jingithuh ba kyrpang na ki nongpyniaid ba kan pynlong ia kawei na ki Group Match jong kane ka lympung, ia kaba la antad ba ia kane ka jingiakhun yn lah ha kaban pynlong ia ka ha JN Stadium, Polo.

Kumban shu pynkynmaw ba na ka liang ka sorkar jylla ka la khreh ba kan pynlong ia kane ka lympung ha u snem uba la dep, hynrei ka jingbym pat shim la biang jong ka madan ban pynialehkai, kumta la hap ban kynriah noh pat ia ka sha kiwei pat ki jaka.

Pynban mynta pat ka snem, na ki dur ki dar la sakhi ba ka madan ka la long kaba la pynkhreh janai naka bynta ban ioh ban pynlong ia kane ka lympung ialehkai bna nam jong ka ri.

Haba kren ba dki lad pathai khubor, u Lieutenant General Ram Chander Tiwari UYSM, AVSM, SM, General Officer Commanding-in-Chief, Eastern Command u pyntip ba Nalor ka nongbah Shillong kiwei pat ki sorbah kiban pynlong lem ia kane ka lympung ka kynthup ia ka Jamshedpur, Kokrajhar bad khlem da klet ia ka nongbah Kolkata kaba la iai bteng ban pynlong ia kane ka lympung mynta la san snem kynthih.

Kane kan dei ka sien kaba 133 ban lah ban pynlong ia kane ka lympung ha kaba yn don baroh 24 tylli ki team kiban iaknieh ban rah ia ka nam lahduh, bad ki kynhun kiban iakhun ka kynthup naduh ki kynhun ba ialehkai ha ka Indian Super League, I. League nangta sa  kynhun ba la khot sngewbha kiba dei na shabar jong ka ri  lem bad ki kynhun ialehkai jong ki Shipai.

Ha kane ka kynti yn don kumba 43 tylli ki jigiakhun ban long shwa ha ka dur ka round-robin league-cum-knockout, ia kaba ka phainal la buh ban pynlong ha Vivekananda Yuba Bharati Krirangan ha Kolkata.

Ia ki 24 tylli ki kynhun la phiah ia ki ha ki 8 tylli ki group, ha kaba ka kynhun kaba khur bun poin na kine ki group bad ki ar tylli ki best second-placed kin khreh ban jam pat sha ka knockout stage.

Ka Kolkata kan pynialehkai ia ki lai tylli ki Group, katba ka nongbah Shillong bad Jamshedpur mar kawei.

Ka klob kaba bat ia ka nam lahjduh jong kane ka lympung dei kaMohan Bagan, kawei na ki klob ialehkai kaba la rah ruh 17 sien ia ka nam lahduh kane ka lympung.