Ka Lympung Ki Khynnah Seng Khasi Seinraij ha Mukhap haka Sngi Robibar, hap bud ryngkhi kyndon iada COVID-19

Syllad | The Rising MeghalayaJanuary 14, 2022

Ka jingpynkhreh ïaka aiom lehkmen ki hep barit ne ka Lympung Ki Khynnah Seng Khasi Seiñraij kaba 16 kala ïaid shait shait haka shnong Mukhap, West Jaintia Hills District.

Kane ka Lympung Ki Khynnah kadei kaba la thmu ban pynlong naduh u snem 2021 hynrei la hap ban pynsangeh noh na kadaw ka jinglynshop ka ka khlam jingpang COVID-19 haka Jylla bad ka pyrthei baroh kawei.

Hynrei ha kane ka kynti ki Khun ka Seiñraij bad Seng Khasi kila ïoh jingbit na u Deputy Commissioner ka West Jaintia ban pynlong ïa kane ka Lympung haka 16 tarik une u bnai haka shnong Mukhap halor ka phang “Ha la thymmei ban tei ïaka lawei” ha kaba la sakhi ba ka jingpynkhreh ka la ïaid shait shait.

Haka jingpyllait khubor u Bah Pynïaidsuk Lyngdoh General Secretary ula ïathuh ba ka Executive Committee ka la rai ba ki nongïashim bynta na ki 20 tylli ki Circle jong ka Lympung ki Khynnah Seng Khasi Seiñraij ba don hapoh ka Bri U Hynñiewtrep ka kin wan ïashim bynta tang 5 ngut ki khynnah na kawei ka Circle bad ki 5 ngut ki nongïalam jong ki.

Nalorkata ula ong, ki khynnah ruh kin long kiba 15 snem shaneng bad kin long ki khynnah kiba shait ba khlaiñ bad kiba la pyndep ïaka jingshim tika ïada COVID-19.

U Dolloi ka Elaka Jowai u Bah Puramon Kynjin uba long ruh u President ka seng Lympung ki Khynnah Seng Khasi Seinraij ula ïathuh ba ka jingpynlong ïaka Lympung kan long kum ka dak ban pynshlur ïaki khynnah ban pyni pyrthei ïaka sap rwai sap shad ba ki don.