Ka lympung ki samla Seng Khasi Seiñraij ha Mawbseiñ

Syllad | The Rising MeghalayaMarch 15, 2021

Ka lympung ba nyngkong ki khun Samla Seng Khasi Seiñ Raij (Seng Khihlang) kan long ha ka 04/04/2021 ha Seng Khasi Mawbseiñ, Ri Bhoi Pyllun ha Madan Lympung.

U Rgh. S Sari Publicity Secretary ka Sengkhihlang (Seng Kmie), ula ong kane ka lympung kan sdang naduh ka por 10 baje mynstep ha katei ka madan.

Ula ong ha kane ka lympung yn ai iaki kyntien sneng kyntien kraw na ki tymmen ki san bad ki Daloi ki Syiem bad kumjuh na ki President/Secretary ki tnad Seng Khasi Seiñ Raij bapher bapher. Kan don ruh ka jingshad tynrai (La Riti) ba la pynkhreh da ki khun Samla Shynrang bad Kynthei na ki tnad Seng Khasi bad Seiñ Raij Raij bapher bapher.

U Rgh. Sari ula wer ia baroh ki khun ka bri u Hynniew Trep Hynniew Skum na ka Ri ki 12 Daloi bad ki 30 Syiem na ki Seng Khasi bad Seiñ Raij bapher bapher kiba dang bat dang ia ka Niam Tynrai ba phin sngewbha ban ia wan sha kane ka lympung ki khun Samla Seng Khasi Seiñ Raij.

Ka Seng Khihlang kala kyntu ia baroh kiba wan sha ka lympung ban bud iaki kyndon bala buh da ka sorkar ban iada na ka khlam COVID-19 da kaba deng ia ki mask bad sait khuid iaki kti bad kumjuh ruh ia shong jngai iwei ia iwei.