Ka mang tyngka 2021-22 ka JHADC kaba duh jingkyrmen: Lakhon Biam

Syllad | The Rising MeghalayaMarch 26, 2021

“Ka mang tyngka ha une u snem kadei kaba ym don jingkyrmen namar ba ka jingpynlut kadei kaba bun bad ka jingpynmih kaba duna,” la ong u ma Lakhon Biam u nongialam ka liang pyrshah haba shimbynta haka jingiakren iaka mang tyngka ka Jaintia Hills Autonomous District Council (JHADC) ha iing dorbar haka sngi Thohdieng.

Ula ong ba katkum ka mang tyngka kaba la wanrah u CEM, Ma Thombor Shiwat ka jingpynlut kala kot haduh T.186, 65, 21,300 klur kaba duna haduh T.13.15 klur naka mang ban iohlum.

“Lada khein 7 klur shibnai ka tulop ki nongtrei, MDC bad ka pension haka 10 bnai ka tulop ba dangsah ban siew ka konsil kala kot T.70 klur tang haka tulop, kumno ka konsil kan siew ia kane ka ram ki nongtrei,” la ong u Lakhon

Shuh shuh u ma Lakhon ula ong ba mynta ki nongtrei jong ka konsil ki im syrtok bad bun na kila hap ban pynpep skul wat iaki khun ki kti jong ki. Ka Bank ruh kam shaniah shuh iaki nongtrei ka konsil ban ai ram namar ba kim biang shuh ka ioh ka kot jong ki.

Ula ther ruh iaka executive committee halor ka jingshim burom jong ka halor ka jingpyllait pisa ka sorkar jylla sha ka JHADC naka bhah khajna mar pohkhyndew haba ia kane ka pisa ruh la pyllait da ka jingbthah ka iingbishar Meghalaya High Court hadien bala ai mukotduma ka synjuk ki nongtrei JHADC staff association.

Mynjur ka JHADC iaka mang tyngka 2021-22, thalain u ma Thombor ia ki MDC BJP

U Ma Lakhon ula kynthoh tyngeh iaka Executive Committee kaba kyrtian dien hadien iaka rai buh monitoring gate ha ki kharkhana dewbilat namar ka jingtuklar ka sorkar jylla bad u la buh kylli balei ba ka Executive Committee ka ai lad ïa ka sorkar ban tuklar haba haka NOC ka JHADC la kdew shai ba ka JHADC kala lah ban buh.

U la dawa ba ka Executive Committee kadei ban pyrshang biang ban buh ïa kitei ki monitoring gate ha ki karkhana cement ban ïa ka buh ïa ki khyrdop Dolloi kiba ktah ïa kiba duk ba rangli.

U Dawan Lyngdoh MDC BJP u la kynnoh ba ka Executive Committee ka ïeh beiñ ïa ki shnong kiba hap ha ki khappud jong ka Jylla bad u la ther tyngeh ïa ka Executive Committee kaba kam shym la leh eiei pyrshah ïa ka jingshalan tuh ïa u dewiong bad ka jinglait rud ka pisa n aka pla tyngka ka sorkar.