Ka Mega Camp ha Mawsynram bad Sohiong Assembly Constituencies

Syllad | The Rising MeghalayaJanuary 24, 2022

Ka ophis jong ka Deputy Commissioner, East Khasi Hills District kan sa pynlong ia ka Mega Camp hapoh ki polling station jong ka Mawsynram bad Sohiong Assembly Constituencies ha ka 28 bad 29 tarik Kyllalyngkot, 2022.

Ha kane ka camp kan don ka jingai tika Covid-19 na ka bynta ki paid nongshong shnong kiba la kot ia ka rta 15 snem shaneng ban registar kyrteng ia ki nongbylla ki bym pat don kyrteng ha ka thup kyrteng jong ka seng ki nongbylla lyngba ka e-Shram, ka jingpynrung kyrteng na ka bynta ka card Aaadhar bad ka jingpyniasoh ia ki Adhar card na ka bynta kiba bat ia ki Card Ration.

Kan don ruh ka jingai tika iada naka bynta ki nongtrei ba mih sha khmat (FLW), ki tymmen kiba 60 snem ka rta bad shaneng kiba don jingpang lypa bad kiba la pyndep 2 wat ia ka tika bad la kumno kumno 9 bnai naka Tarik ha ki shim ia ka tika ha ka sien ba ar.

Ha kaba iadei bad ka jingai tika Covid-19 hapoh kitei ki polling station la kyntu bad ai jingmut ia haroh ba kin shim khia halor kane ka bynta bad ban leit tika ialade ha kitei ki sngi kiba la kdew haneng, khamtam eh ba mynta, sa uwei u virus thymmai uba ka WHO ka la jer kyrteng kum U Omicron u la sdang ban ktah ia ka pyrthei hi baroh kawei.

Ban iada na une u Virus dei tang ka tika kaba lah ban iada ia ngi bad ka imlang ka sahlang ka jong ngi. Da kaba ai tika wat lada ngi ioh ia kane ka jingpang ruh hynrei ka pyllait ia ngi na ka jingleit thiah ha ki hospital bad lait na ka jingiap.

La pynshlur ia ki paidbah jong ka Mawsynram bad Sohiong Assembly Constituencies ba kin leit ai ia ka tika ha ki jaka ba la pynbeit hapoh ki polling station jong ki ha ka 28 bad 29 tarik Kyllalyngkot 2022 bad ba kin ym pynlehnohei ia kane ka lad ka kabu kaba ka Sorkar ka ai na ka bynta ka bha ka miat jong baroh.