Ka Meghalaya Games 2024: Kyndeh ka sor Tura ban pynlong noh ia ka Meghalaya Games

Syllad | The Rising MeghalayaJanuary 14, 2024

Ka jingpynkhreh na ka bynta ka jingplie ïa ka 5th Meghalaya Games 2024 ka la iaid shakhmat ha kaba baroh ki nongïashim bynta ki la wan poi ha nongbah Tura ha ka step jong ka sngi U Blei.

Ia kitei ki nongïalehkai la pdiang sngewbha da ki dkhot ka Meghalaya State Olympic Association (MSOA) lem bad ki bor pyniaid District jong ka West Garo Hills ha ISBT, Tura na ka bynta kane ka lympung ka ban neh baroh shi taiew lynter.

Kane long ka sien kaba nyngkong eh ban pynlong ha ri lum Garo Hills ha kaba yn ban plie ka President ka ri ka Droupadi Murmu ha PA Sangma Stadium kaba ha Tura.

Kumta kane ka jingwan poi jong ka khliehduh jong ka ri, kan nangpynsah jingkynmaw shuh shuh ia kane ka lympung bad kumjuh ia u paidbah jong ka ri lum Garo.  

Lada poi ban iuhkjat mynta ha Tura, ka shong ka thaw bad ki kyntoit ki la kup ia ka rong kaba itynnad hadien ba manla ki lad la wah ïa ki banner ne poster kiba heh bad kiba rit kumjuh ban pynpaw ia ka dak ba kum ka sor ka la khreh ban pdiang bad ban pynlong ïa kane ka lympung ïalehkai baheh ka Jylla bad ka ban ïaid beit ïaid ryntih.

Haba pdiang sngewbha ïa ki nongïalehkai ha ISBT, Tura, la pynlong ïa ka put ka tem da ka kynhun tem jong ka Meghalaya Grassroots Music Project ha kaba ki jingrwai ki long na ka bynta kane ka lympung bad ki ban ai mynsiem ïa ki nongïalehkai ba kin ïalehkai bha.

Shuh shuh la pynbiang ruh ïa ki lad ai jingsumar ha ISBT na ka bynta ki nongïalehkai kiba don hapdeng ki jingmynsaw.

Ha ka por janmiet pat ki nongïalehkai ki la poi lut ha PA Sangma Stadium na ka bynta ban pynkhreh ïa ki prokram bapher bapher jong katei ka jingplie bad ruh ba kin hap ban bud ïa ki kyndon na ka bynta katei ka jingwan iuh kjat ka President jong ka ri.

Ha kane ka lympung yn ïashim bynta da kumba 3000 ngut ki nongïalehkai na kylleng ki district bapher bapher ki ban ïashim bynta ha ki 23 tylli ki jingïalehkai ki ban pynlong ha ki 16 tylli ki jaka kiba don ha ka nongbah Tura.

Lada ngin ïa kyrtiang dien sha kane ka lympung kaba la long ha u snem 2022, watla ha kaba sdang ka la don ka jingduna ha kiba bun ki liang, pynban hadien ba la lah ban weng ïa ki jingeh bad la pynbit pynbiang ka lympung ka la iaid shakhmat ha ki 19 tylli ki jait jingialehkai ba la pynlong ha ki 13 tylli ki jaka bad ïashim bynta shitrhem da ki 3000 ngut ki samla.

Ia ki jingïalehkai la pynlong ha Laban Indoor Stadium, Shillong Club, Madanrting Indoor Hall, Assam Regimental Centre, NEHU, Mawlai Mawroh Community Hall, Mawlai Madan Heh, Crinoline Swimming Pool, Khlaw Malki, Shillong Golf Course, NEIGRIHMS bad ha Sports Authority of India (SAI) Training Centre.

Ha kane ka lympung kumba 700 tam ki takma la lah ban sam sha ki samla ïalehkai ba la ioh ban khur ïa la ki nam jop ha ki jingïalehkai bapher bapher.

Dei ha ka sngi pynhap pyrda ïa ka lympung la ïoh ruh ban sakhi ïa ka jingpyni ïa ka rukom ïalehkai jong ka gymnastic ba la ai da ki khynnah barit jong ka Gymnastics Association of Meghalaya.

Ka jingpyni sap ki heprit ka la pynshohbiej ia baroh kiba la wan ban sakhi ïa kane ka sap kaba ki don.