Ka Meghalaya Haki 50 Snem Ba La Leit

O R ShallamJanuary 20, 2022

Ka State ka jong ngi da kaba sngew burom iaka Sorkar India haka por jong ka Mrs. Indira Gandhi, ka Prime Minister haka 21-01-1972. Ki nongialam ka State ka jong ngi naduh U Captain William Son Sangma, B.B Lyngdoh, Hoping Stone Lyngdoh, H.E Pohshna, Humphrey Hadem, Edwin Son Bareh, D.D Pugh, Habarsing, PR Kyndiah, Radhonsing Berry Lyngdoh, PG Marbaniang, GG Swell, Narayan Majaw, SK Shilla, PA Sangma, Stanley Nicholas Roy bad kiwei kiwei de kiba ngam lah ban jer jut. Ki la buh ka nongrim kaba skhem ia kane ka state ka jong ngi naduh ka pule ka puthi, pynneh pynsah iaki khlaw ki btab ka mei mariang, ka bording sha baroh ki jaka, ki lynti ki syngkein, kin ri mrad bad ki dohkha, ki mar poh khyndew, ki ieng sorkar ha man la ki District, ki Iew haka rukom kaba thymmai, ki jaka jngoh kai pyrthei, pynnneh pynsah iaka Dustur ka Riti, ithuh ia ki major Festival kum ki State Festival, ka lad pynioh kam ia ki lai tylli ki tribe (Khasi ,Jaintia bad Garo).

Tangba kawei kaba ngi lah ban kdew hangne imat ba la kmen palat ba ngi la ioh iaka State pura ngi klet noh U PUD U SAM (Boundary) jong ka State jong ngi. Na ki daw kiba ym tikna u pud u sam ioh lad ka Assam ban kyntur sha kiba bun ki jaka khap pud. Kane ka kah dum iaka state bad ka jaitbynriew bad shi troh.

Ki Nongialam ba kha kyrpang ki wan ki leit, ki wan rah ka roi ka par ngi dap daka jingsngew burom ia ki. Hynrei katba nang iaid ka por ki jing dawa ki bun ha ki paitbah nongshong shnong. Ki khraw pyrkhat kiba paw tang ha ki khyndiat por U Prof. B Pakem, Thranghok Rngad, Dr.Donkupar Roy, EK Mawlong, Dr.F.Khonglam, S.K Sun, Albin Lamare, Junden Pohrmen bad u Misalan Suchiang bad kiwei kiwei de kine kiba bam kwai ha dwar u Blei. Kiba dang don haduh mynta kum SC Marak, Prof RC Laloo, SK Khongwir, Kong.Roshan Warjri kine ruh ki la leh shibun haka roi ka par ym tang iaka Constituency ne ka District lajong iaka state hi baroh kawei.

Mynta pat ha kine ki khyndiat snem ka mut ban kdew hangne naduh u 2008 ter ter la kha da ki Business Politician ki don na pdeng ki Nongmihkhmat mynta kiba shah jied da kaba shu thied iaki paitbah daka spah kaba ki don. Kum ki Nong Meghalaya kiba don ka jingiatiplem, buh da u dak jingkylli? Ia nga bad ia phi shaei ngi la tap noh da kane rong shah thied ia baroh kito ki jingbhabriew ka state ka jong ngi, ym dei tang kata la mih ki jingkwah rhah napdeng ki riew rangbah kiba mih pyrthei ban kdew kti iaka Government ia kane katai kiba ym biang ha kane ka sorkar ba mynta ba la tap daka jingbymhun ha ngi ki nong shong shnong, kum kita don kiuba la ioh kam kum ki Adviser jong U CM, hato ha kane ka sorkar MDA katno ngut ki Adviser u CM ba mynta u don, imat ba la bun palat kaba ai jingmut ia u, poi sha ka jingbym hun shuh u paitbah. Kine kiba la ioh Tulop bad shuki bad kamra ha Secretariat kila biang ki la jah na ki daily newspaper.

Nga kylli mynta hangne imat une u CM jong ngi mynta u la klet iaka Jaintia Hills District (East & West) namar bay m don Adviser ia U na kine ki District baroh ar tylli. Lada shim hka liang ka roi ka par, ka Iew Iawmusiang, Ki Lynti ki Syngkein shu repair tang dep, ka umbam umdih ruh kam biang, ka pule ka dangle ka la hiar, ki Infrastructure katkum ka por ba mynta, lada phai khmat sha ka Health Centre ha East Jaintia ym don eiei bad ka West Jaintia ruh kam pat don ki Infrastructure haka Health Centre, ki Law Kyntang naka liang ka sorkar ka khlem leh eiei bad ka rep ka riang ruh ym biang, ka Tourism Potential kaba boon kyrhai ha kine ki District hynrei ka sorkar kaba mynta ka khaprib ka kyllut ia kane ka spah kaba kane ka District ka don.

Lyngba kane ka jingthoh jong nga, ka reservation policy jong ka Government mynta ba ka la dap 50 snem la dei ka por ban pynkylla iaka sha ka Open Competition baroh 80%, ki Tribe kiba don Khasi, Jainti bad Garo, ka jingkylli mynta ka mih kumno ka Reservation halor ka Reservation? Lada  kane ka sorkar ba mynta kan nym pyrkhat kloi ia kane ngi poi sha ka lehraiñ.

Hato u dewiong uba baroh ngi la iatip la khang ban tih (Blanket band) bad ban shalan, kane ka MDA Government ka leh aiu ia kata ka jingkwah ka bor kaba halor “Mining Policy” kumba ai statement U Deputy CM u ong ba kiba ki leh ia kane ka kam ia die ia thied dewiong daka jingtip ka BOR ba khang ia kane ka jingkhaii mar poh khyndew, haba kumta naka bynta uba bun ba lang ngi kwah ban tip haduh katno ka Revenue Collection kane ka MDA Government na u Dewiong, Mawshun bad kiwei de ki mar naduh u April 2018 haduh mynta ka sngi bad kumno ka share ki District Council kiba don hapoh jylla. Lada ka sorkar ka leh hok leh khuid ka dei ban pynmih madan lym kumta ka CBI inquiry la don kam ha kane ka Rukom iaid ki Loaded Truck haka por mied.

Ki Check gate kila mih kylleng ki jaka haka National Highway bad police bad District Council ia khrong pisa la i kulmar ia kiba pli ki Driver. Ka la dei ka pork o ki Para Nong Shong Shnong ka Meghalaya khamtam ha Khasi Jaintia ban sei madan da ki Leader bad iada iaka Hok ka jaitbynriew, ym dei shuh da ki Business Politician kiba kjit iaka snam ka jaitbynriew lyngba ka pisa ba ki thied ia ki VOTE. Lada ngi bakla biang kum ha u 2018 ter ter kane ka State jong ngi kan da KYLLA DUR.