Ka Meghalaya ka don palat 1 million ki dieng Sohphan, shim kabu ban pyniaid iew: Ampareen

Syllad | The Rising MeghalayaJuly 27, 2023

Ki don haduh palat shi million tylli ki dieng Sohphan ha ki bynta bapher bapher ka jylla Meghalaya, kata kiba mih sha ki lyndet kper khlem da donkam ban sumar sukher bad pynleit jingmut khnang ban lah ban kyntiew ia ka ioh ka kot, ong ka Myntri sorkar ka Dr Ampareen Lyngdoh haba kren ha ka jingialang ba la khot pynlong da ka  Directorate of Food Processing halor ka ‘Jack Start 2023’ hapoh State Convention Centre, Shillong haka sngi Palei.

Haba ai jingkren kum ka Kongsan kane ka Myntri ka rep ka riang ka la ong ruh ba ka long kaba donkam ban pyniar shuh shuh ia ki kam khaii pateng lyngba u Sohphan bad ban khmih kumno ki nongrep ki la ioh jingmyntoi.

Ka Myntri ka la ong ruh ba ka la dei ka por na ka bynta ki nongseng kam bathymmai ba kin sdang ia ki kam khaii pateng lyngba une u jait soh uba don kynrei ha kane ka jylla. Kumjuh ka la kyntu ruh ia ki ophis ka tnat Agriculture bad Horticulture ba ki bteng ban iatreilang bad ki kynhun kiba pynmih bad ban aijingkyrshan ia ki khnang ban pynthikna ba ki mar ba la pynmih kin long kiba jop bad ruh ban bud ryntih ha kaba iadei bad ka jingshngain ki marbam ba la pynmih namar dei halor kane kaba ki jaka iew jong ka pyrthei ki phaikhmat.

Ha kane ka jingialang la ioh ruh ka jingkren na u K.N. Kumar, Chairman, Meghalaya Farmers’ (Empowerment) Commission uba la pynpaw halor ka jingdonkam ban kyntiew ia ki jait jingbam ba la pynmih lyngba u sohphan ha ka jylla, katba u bah ML Suiam, Officer in Special Duty, Directorate of Food Processing u la ai ka jingpynshai kaba bniah ha kaba iadei bad ka ‘Mission Jackfruit.’

Ha kane ka jingialang ka Kong Ampareen ka la pynlong ruh ka jingjurip ia kiba bun tylli ki stall kiba dei ia ki mar bam bapher bapher ba la shna bad pynmih lyngba u sohphan.

Kiwei pat kiba la ia don lang ha kane ka jingialang ki kynthup ruh ia ka Kong  Isawanda Laloo, Secretary Department of Agriculture & Farmers Welfare, ki heh sorkar na ka tnat Agriculture bad Horticulture, ki nongseng kam lajong, ki nongrep bad kiwei kiwei.