Ka Meghalaya ka lah ban pynlang tang 1 billion na ka 63 bn cubic litre ka um slap, ong u CM

Syllad | The Rising MeghalayaNovember 9, 2023

Ka jylla Meghalaya ka la ioh pdiang haduh 63 billion cubic litre ka um man la u snem lyngba u slap, kaba dei kaba heh bha, hynrei ka jylla ka la lah ban pynlang tang 1 billion cubic litre, ong u Myntri Rangbah ka jylla u Conrad K Sangma ha ka jingplie ia ka ‘Meghalaya Water Smart Kid campaign,’ ka jingtreikam kaba hap hapoh ka Jal Jeevan Mission (JJM) ban pynshai paidbah halor ka jingdonkam ban tyngkai ia ka um hapdeng ki khynnah.

“Ka Meghalaya ka dei ka jaka kaba ioh slap tam ha ka pyrthei. Ngi la ioh haduh 63 billion cubic litre ka um na u slap man la u snem ha kaba 31 billion cubic litre ka leit shapoh Bangladesh bad 31 sha Assam,” ong u Conrad Sangma.     

Ban shimkhia halor ka mat kaba iadei bad ka jingdonkam ban tyngkai ia ka um, u CM u la ong ba na ka liang ka sorkar jylla ka la shim ia kiba buntylli ki sienjam ba la kyrshan lyngba ki projek kiba na shabar bad na ka liang ka Ministry of Jal Shakti, ka Sorkar India.

U pyntip ruh ba la shna ia kumba 1000 tylli ki jaka pynlang um ha baroh ki bynta ka jylla khnang ban lah ban pynlang ia ka um slap bad ban kyntiew ia ka jingdon um hapoh khyndew lyngba ki projek bapher bapher. “Ngi la shim ia baroh ki sienjam ban tyngkai bad pynlang ia ka um khnang ban pynthikna halor ka jinglah ban pynbiang ha ka jingdonkam um bad ruh ban pynkhie im ia ki tyllong um ki jong ngi,” ong u Myntri.

U Myntri u pyntip ba ka tnadt ublic Health Engineering kala ioh bun bah ka song pisa na ka JJM bad EAP, kaba la jan kot ia ka T.8000 klur. “Ngi don ka jingialeh hakhmat jong ngi bad ki Ophisar kila treikam khlem shongthait ban kynjoh ia ka thong ha kaban pynthikna ba baroh ki Longiing ha Jylla kin ioh ia ka um,” ula ong .

Ha kajuh ka por, u Myntri Rangbah u pyntip ba hapoh ka JJM, ka Jylla kala ioh ia ka khusnam kum ka Jylla ba pyntreikam bha (best performer) da ka Ministry ka Jal Shakti nalor ka jingioh ia ki song pisa. U la ong ruh ba ka Jylla kala pyndep palat 4 lak ki longiing ha ka jingpynioh kor um hapoh Iing bad hapoh u Lber 2024, ka thong ban pyndep ka long 6 lak ki longiing.Nalor kata ha kane ka  jingialang, u Myntri Rangbah  bad u Myntri ka Tnat PHE u Marcuise Marak kila aiti ruh ia ka khusnam Water Guardian halor ka jingpyrshang ban iada bad tyngkai ia ki tyllong um.

Ia kane ka khusnam la ai sha ka shnong Lumshyiap bad ka Water Sanitation Community ka Ri Bhoi District, ka Shnong Darechikgre bad ka Water Sanitation Community ka West Garo Hills District lem bad ka shnong Dura Kantragre bad ka Water Sanitation Community ka West Garo Hills District.