Ka Milk Mission kala kyntiew iaka kam ri masi pynmih dud bad ka kamai kajih, ong Bah AL Hek

Syllad | The Rising MeghalayaNovember 30, 2023

Ka Directorate of Dairy Development haka sngi Palei ka la rakhe ia ka ‘National Milk Day’ hapoh Central Dairy ha Mawiong ha ka jingiadon lang u Myntri sorkar uba khmih ia ka Tnat  Animal Husbandry & Veterinary u Bah AL Hek kum u Kongsan bad u SC Sadhu, Secretary, A.H & Veterinary Department kum u Symbud Kongsan.

Haba kren ha ka jingialang u Bah Hek u la ong ba ka jylla Meghalaya bad ka ri hi baroh kawei ki la rakhe ia kane ka sngi shibynta ban kynmaw burom ia ka lyngkhuh sngi kha jong u Dr. Verghese Kurien ia uba la tip kum u kpa jong ka ‘White Revolution,’ uba la trei shitom ban kyntiew bad wanrah ka jingkylla ha ka dairy sector lyngba ki jingtrei borbah bad ki jingnoh synniang ki jong u ban pynlong ruh ia ka kam ri jingri (masi) ban pynmih ka kam kaba kyntiew ia ka kamai kajih.

U la ong ruh ba naduh kine ki khyndiat snem kiba la leit, ki nongshong shnong ka jylla ki la sngewthuh halor ka jingkordor bad halor ki jingmyntoi ia ka koit ka khiah kiba lah ban ioh lyngba ka dud lem bad kiwei pat ki marbam ba la shna na ka dud, bad kane ka la pynlong ruh ban nang pynjur ia ka jingdawa ha ka jingpynmih dud.

Nalor kata u la ong ruh ba lyngba ka Meghalaya Milk Mission, ki nongri masi khem dud bad ki kynhun iatreilang cooperative society kiba shimkhia ha kane ka kam ri masi ki la sakhi ia ka jingkiew ha kane ka bynta jong ka jingtreikam bad kaba la pynlah ruh ia ki ba kin kiew ha ka liang ka kamai kajih.

Shuh shuh na ka liang u Myntri u kyrmen ruh ba ha ki snem ki ban wan, na ka liang ka sorkar pdeng kan wanrah shuh shuh ia ki skhim ki ban kyntiew ia kane ka kam pynmih dud ha ka jylla.

Ha kane ka prokram na ka liang u Kongsan u la sam ruh ia ki khusnam sha ki khynnah pule kiba la iashim bynta ha ki jingiakop bapher bapher kiba iadei katkum ka mat jong kane ka jingrakhe.Nalor kata u la sam ruh ia ka khusnam sha ki nongri masi bad ki cooperative socieity halor ka jingjop ka jong ki ha ka ban kyntiew ia kane ka kam hapoh ka jylla.

Kiwei pat kiba la aijingkren ha kane ka prokram ki kynthup ruh ia u SC Sadhu, Secretary, A. H & Veterinary Department nalor kiwei pat.