Ka Mukhla Raij ka kynhun kaba saw ban buh jaka haka semifinal 1st Div ka WJDSA

Syllad | The Rising MeghalayaNovember 7, 2022

Ka Mukhla Raij ka long ka kynhun kaba saw ban buh jaka haka kyrdan semifinal jong ka lympung ialehkai 1st Division Football Tournament kaba pyniaid da ka West Jaintia District Sports Association (WJDSA). Kane kala wan hadien ba kala khur namjop da 1-0 pyrshah iaka Wahiajer haka jingiakhun kaba long ha madan Kiang Nangbah Stadium haka sngi Nyngkong.

Ia kane ka kol la thep da u Joydeep Bamon (63) kaba la biang pura iaka Mukhla Raij ban khur iaka namjop bad buh jaka ialade haka semifinal ka 1st Division mynta ka aiom ialehkai.

Da kane ka namjop ka Mukhla Raij kan mih madan ban aireng pyrshah iaka Moosyiem Shangpung haka 12 tarik por 1:30 pm, katba ka Nangbah Iawmusiang kan aireng pyrshah iaka Sailung Ialong haka 11 tarik por 1:30 pm.

Kawei pat ka jingiakhun, ka Moosalyngkat kala jop da 3-0 iaka Chilliangraij. Ia kine ki kol la thep da u Ksohlangki Rymbai (12), Rikenson Suting (44) bad u Lalthakuma Ngaite (62).