Ka Mukhla Raij ka lahduh haka 4th Debo Shullai Memorial Trophy

Syllad | The Rising MeghalayaSeptember 30, 2019

JOWAI: Ka Mukhla Raij kala ïoh rah ïaka nam lahduh haka 2^nd Division Football Tournament ka ‘4^th Debo Shullai Memorial Trophy’ kaba pynïaid da ka West Jaiñtia District Sports Association (WJDSA). Kane kala wan hadien ba kala pynliem ïaka Lutituber Ialong da 2-1 haka jingïakhun final kaba long haka sngi Nyngkong ha Kiang Nangbah Stadium.

Haba phai sha ka jingïakhun ka Mukhla Raij ha kane ka jingïakhun kala shah tam shuwa da 1 kol naduh ka kylla step haka Lutituber Ialong lyngba ka kol kaba la thep da u Mihsalan Lyngdoh (27). Kane ka kol kala neh haduh bala wai ka kylla step.

Haka kylla miet ka Mukhla Raij kala ïalehkai da ka sur ïalehkai kaba itynnad bad kala tynjuh bor bah ïaka kut ïalehkai jong ka Lutituber bad kala ïoh ruh bun tylli ki kabu ksiar, hynrei ka jingpnah u nongap kol ka Lutituber ula lah ban kyrda ïaka bol bad lait na ka jingshah thep kol.

Wat la katta ruh ka Mukhla Raij kaba la lah ban ïalehkai shiteng madan haka kylla miet, hynrei ka shimpor ïaka tad haduh ka minit kaba khatduh ban ioh ban thep ïaka kol lyngba Joydeep Bamon (78) ban tan ïaka jingiakhun sha kaba ïakhaid.

Da kane ka jingïakhaid la rah ïaka jingïakhun sha ka extra time bad ka Mukhla Raij kala pyntam shikol bad khur ïaka nam lahduh ha kane ka aiom. Ïa kane ka kol la thep da u Booster Sana (86).

Da kane ka namjop ka Mukhla Raij kala rah ka song pisa T.20 hajar bad ka Lutituber T.10 hajar. Ïaka nam Top Scorer la khur da Nudeisa Dhar u nongïalehkai ka Lutituber Ialong uba la ïoh thep 7 kol ha kane ka aiom.

Ka nam Best Goalkeeper, la ioh da u Yooki Syngkon jong ka Mukhla Raij, Player Of Tournament u Masan War nongïalehkai ka Luti Tuber Ialong bad ka nam Man Of The Match la ïoh da u Joydeep Bamon ka Mukhla Raij uba la lah ban pynkylla ïaka resol jong ka jingïakhun

Ïa ki khusnam  da kiba haiing u (L) Debo Shullai u Ma Sanbor Shullai, MLA ka Shillong South, ka Kong Yoomika Shullai, Chemi Lanong u khun u (L) Debo Shullai, u MDC ka Jowai Central u Andrew Shullai, u MDC ka Mynsngat u Dawan Lyngdoh bad u MDC ka Nangbah u ma Lakhon Biam haka jingïadonlang u Hony. General Secretary WJDSA u Ma Lammat OO Laloo, u Vice President WJDSA u Patrick Lamare bad kiwei kiwei.