Ka mukotduma iaka bamsap JHADC, yn kyndang ka BJP sa iaki projek ba sahteng ha rilum Jaintia

Syllad | The Rising MeghalayaOctober 17, 2020

Ka Bharatiya Janata Party (BJP) kala dep ban ujor da ka mukotduma pyrshah iaka bamsap JHADC bad kala rai ruh ban pan da ka RTI ban kyndang iaki projek ba sahteng ha riilum Jaintia.

U state president jong ka BJP bah Ernest Mawrie ula ong “Ngi la dep ujor da ka mukotduma pyrshah iaka bamsap jong ka Jaintia Hills Autonomous District Council (JHADC) halor ka skim SAG ban sei madan iaka jingbamsap bad pynbeit iaka jingtreikam jong kane ka konsil,”.

“Ka Executive Committee kaba mynta kala bamsap shaba palat liam bad ngi dawa da ka jingtohkit CBI hakajuh ka por ngi ujor mukotduma ruh shaka iing bishar ba kan ai iaka rai khnang ban wanrah iaka jingkhuid jingsuba haka jingpyniaid iaki kam ki jam jong ka konsil,” la ong u Bah Mawrie haka jingwan iuhkjat ba nyngkong jong u ha West Jaintia Hills haka sngi Thohdieng.

Kane ka jingwan jong u sha West Jaintia Hills ka dei naka bynta ban pynkhlain iaka jingtreikam ka BJP ha ki 5 tylli ki constituency.

Ha kane ka jingwan jong u sha rilum Jaintia la pynlong iaka jingialang ha Infinity Hall, Ladthaldboh, Jowai. La iadonlang u ma Singh Mulieh MLA barim ka Jowai, uba long State General Secretary incharge West Jaintia Hills District, ma Lakhon Biam MDC JHADC uba long u State Secretary In Charge East Jaintia Hills District, Dawan Lyngdoh MDC JHADC uba long u State Executive Member, ma Shaphrang Lyngdoh President West Jaintia Hills District, B. Marak Vice President uba long ruh u Spokesperson BJP bad kiwei kiwei.

Shuh shuh u Bah Ernest ula ong ba ha kane ka jingwan jong u, ula lap ba ki nongtreikam ka party BJP kilong kiba tylli mlon. Kila iakren halor ban pynpoi hok sha u paidbah iaki skim jong ka sorkar kmie naduh ka Jal Jeevan Mission hapoh ka tnad PHE ban pynioh umbam umdih bad Saubhagya scheme.ka skim pynioh bordinig iaki longiing sha baroh u nongshong shnong nalor kiwei kiwei ki skim.

Haba kylli iaki skim sahteng ha Rilum Jaintia, u Bah Ernest Mawrie ula ong “Ngi la rai ban pan da ka RTI ha baroh ki tnad sorkar ban kyndang iaki projek sahteng da ki bun bun snem kiba long ki mawjynthud iaka roi ka par ka rilum Jaintia.”