Ka Nagaland kaba treikam ka Article 371 ka kwah ia ka Sixth Schedule, sa bishar hi da lade, ong u Pyniaid

Syllad | The Rising MeghalayaFebruary 3, 2025

U Chief Executive Member (CEM) ka Khasi Hills Autonomous District Council (KHADC), u Bah Pyniaid Sing Syiem u la pyndep ia ka jingthep kyrteng hynne ka sngi 3 tarik Rymphang ha ISBT, Mawiong kum u kyrtong ka National People’s Party (NPP) na Nongthymmai constituency.        

Ha kane ka sngi la synran lang ia u da u da ki nongialam jong ka Confederation of the North East Councils kiba mihkhmat ia ki shiphew tylli ki Autonomous District Councils (ADC) jong ka thain Shatei Lammihngi kaba kynthup ia u Deputy Chief Executive Member (CEM) ka Bodoland Territorial Council, u Executive Member ka Karbi Anglong Autonomous Council (KAAC) Member ka Chakma District Council ka Mizoram bad kiwei kiwei nalor ki nongtrei bad ki nongkyrshan ka party. 

Haba kren sha ki lad pathai khubor, u Bah Pyniaid u kyntu ia ki paidbah ka Rilum Khasi-Jaiñtia ba kin thep ia ki vote jong ki da ka jingstad da kaba ong, “Nga kyntu ba phin jied ia ki kyrtong kiba lah shisha ban trei da kaba buh ha ka jingmut ba ka kam MDC ka dei kaba eh bha khamtam haba peit halor ka jingtyrwa ban pynkylla ia ka riti synshar ha ka iingdorbar Parliament.”

Haba kren halor ka jingdawa jong ka Seng Voice of the People Party (VPP) ia ka Article 371, une u heh ka KHADC u la ong, “Lada ki briew ha ka thain mihngi jong ka Nagaland kiba la don lypa ia ka Article 371, ki dang hap ban wan iakynduh ia ngi shane namar ba ki kwah ïa ka Sixth Schedule te sngewbha ban bishar hi da lade kaei kaba kham kongsan bad kaba kham  donbor na ka bynta ki jaka riewlum jong ngi.”

“Namarkata, nga kyrpad ia ki paidbah ba ki dei ban kyrshan ia ki kyrtong kiba lah ban trei da kaba buh ha ka jingmut ia ka jingdonkam jong ngi ban pynkhlaiñ shuh shuh ia ka Sixth Schedule sha ka Riti Synshar ka ri India na ka bynta ban iada ia ka jaidbynriew trai ri trai muluk.”

U Bah Pyniaid uba dei ruh mynta u MDC ka Sohryngkham u la kyrpad ryg ia baroh ki kyrtong ba kin buh sharud ia ka jingsngew party hadien ba la shah jied sha ka District  Council da kaba ong, “Ki paidbah kim ju jied ia kano kano ka party ha ka elekshon MDC, hynrei ki jied ia u briew shimet bad kaba kham sngewtynnad ruh ka long ba ha ki ADC  ki party kam don jingktah ei ei ruh.Watla nga la pyniasoh sha ka NPP, hynrei ka khubor kaba nga kwah ban ai sha baroh ki kyrtong ka long ba hadien ba la shah jied ki dei ban weng sharud ia ka jingsngew party bad ban pynthikna nyngkong shwa na ka bynta ka  bit ka biang bad ka bha ka miat jong ki paidbah.”