Ka Namdong kala dei hok ban ioh C&RD Block ong u MDC Mynsngat Khanduli

Syllad | The Rising MeghalayaApril 15, 2021

U MDC ka Mynsngat Khanduli u Dawan Lyngdoh, ula ong ba kala dei eh ka por ban kyntiew iaka Namdong sha C&RD Block haka sngi Balang.

Kane ka jingdawa pynkha C&RD Block iaka Namdong kaba don ha West Jaintia Hills District kadei kaba la sdang naduh u snem 2013 kaba na kaliang ka shnong kala ai sngewbha ruh iaka jaka ban tei iaka ophis haka jaka kaba heh 18.48 acres bad la dep ruh ban soi iaka soskular bad ka bor synshar district ka West Jaintia Hills.

Une u MDC ha u bnai Kyllalyngkot 2021 ha ryngkat bad ki nongialam ka raij Namdong kila iakynduh ia u Myntri ka tnad C&RD u Bah Hamletson Dohling halor ka jingdawa ban pynkha iaka C&RD Block iaka Namdong, hynrei haduh mynta kam don kino kino ki dak ki shin na ka sorkar ba kan khreh ban pynkylla C&RD Block iaka Namdong.

Une u MDC ula ong ba “Ka Thadlaskein C&RD Block ka long kawei na ki Block kaba heh duh na pdeng ki 5 tylli ki C&RD Block ha Rilum Jaintia naduh ka jingbun ki shnong ka jingbun briew ka jingheh ka jaka. Ka Thadlaskein C&RD Block ka don haduh 1,36,835 ngut ki nongshong shnong katkum ka census 2011 bad ka jingheh ka area ka long haduh 896.60 Sq.Km. Ka jingdon ki shnong haduh 137 tylli bad la don hok ban pynkha sa kawei ha Namdong kumba la dep ai ai ka jaka.”

“Haba ïa nujor bad kiwei ki C&RD Block hapoh Jaintia Hills ka Thadlaskein C&RD Block ka la heh ia ki haduh ar lai shah, kum ka nuksa ka Amlarem Civil Sub-Division ka don tang 398.00 Sq.Km, ka jingheh bad ka jingbun briew tang 43,552 ki shnong ki don tang 95 tylli. Ka Laskein C&RD Block ka don tang 390.40 Sq.Km, ka jingheh bad ka jingbun briew tang 89,965 bad ki shnong ki don tang 87 tylli, kumta nga sngewdei eh ba ka sorkar MDA ka dei ban pynioh nyngkong ïa ka Namdong C&RD Block kaba la dei hok ban ioh bad kaba ki paidbah ki da don kam shisha namar ka jingjngai naduh ki shnong border kum ka Lapangap Khanduli bad kiwei ka la ktah ia ki jingmyntoi u paidbah ban pyndep ha ka por kaba biang,” ong shuh shuh une u MDC.

U Dawan Lyngdoh ula kyntu ruh ia ka sorkar MDA ban pynkiew kyrdan noh ia ka Namdong PHC sha ka CHC , ia ka Khanduli Sub-Centre sha ka PHC na ka bynta ka bit ka biang uba duk uba rangli ha katei ka thain kaba hap ha khappud Assam Meghalaya.

Ula ong ruh ba Namdong PHC la dep ban shna ia ka building CHC naduh u snem 2012, hynrei haduh kine ki sngi ka la sah kut ka jingthmu ban plie bad ban pynbiang ia ki nongtrei, kumta halor kane ruh ula kyntu ia u myntri ka koit ka khiah ka jylla bah A.L. Hek ban pynioh ia kane ka jingdawa u paidbah.

Ha kaba iadei bad ka pule ka puthi une u MDC ula dawa n aka tnad pule puthi ban phai khmat sha katei ka thain ban pynbha pynmiat iaki ïing skul kiba bun ki skul kila jot la pra.

U Dawan ula ong ba ka sorkar MDA ka dei ban pynioh lane pynkha ia ki PHC/CHC, C&RD Block bad District, hapoh ka jylla ha ki jaka ba dei hok ban ioh. Ula ong ruh ba u Chief Minister Conrad K Sangma u la kubur ba yn pynkiew kyrdan noh ia ka Mairang Civil Sub-division sha ka District ba pura bad ia ka Mawryngkneng PHC sha ka CHC, kumta ka Rilum Jaintia ruh ka dei ban ioh iala ka hok, kata ban kyntiew kyrdan ia ka Laskein C&RD Block sha ka Civil Sub Division bad ban pynkha iaka Wapung C&RD Block kaba la kular da u myntri rangbah ula kular ban pynurlong ha kano kano ka por ba ka sorkar ka ioh pisa.