Ka Nartiang Constituency haka kyrdan toplist haka liang ka roi ka par, ong u Sniawbhalang

Syllad | The Rising MeghalayaFebruary 12, 2025

U Deputy Chief Minister ka Jylla u ma Sniawbhalang Dhar uba hiar ialap elekshon ha ka shnong Bambthong na ka bynta ban pan ka jingkyrshan ia u CEM JHADC bad kyrtong NPP u ma Thombor Shiwat na Moodop Umladang, ula ong ka “Ka 1-Nartiang Constituency ka don haka kyrdan toplist haka liang ka roi ka par bad kane ka urlong ymdei da ka jingstad ne jinglah jong u MLA hynrei lyngba ka jingstad jong ki paidbah ban jied ia u nongmihkhmat.”

Ha kaba iadei bad ka jingkynthoh ka party VPP, “Hapoh ka 1-Nartiang Constituency hashwa phin kren phin hap ban pyrkhat bha,” ula ong ma Sniawbhalang bad bynrap “Ka VPP ka ju ong ban jied iaka ban wanrah ka jingkylla, hato ka VPP ka dang lah ban pynkylla ia kaba nga la dep leh? bad bynrap kaba kumno pat ka jingkylla kaba ki kwah.”

Ki nongkyrshan ka VPP kidei ban kynmaw ba marsien rung na Mynsngat kin iaid lyngba iaka surok kaba nga pynshna bad pynlong jingialang haki Hall kiba nga shna bad dei tang ka mic hi kaba ki hap ban rah nalade, ula ong.

Haba pan ka jingkyrshan ia u Ma Thombor, u Ma Sniawbhalang Dhar ula ong ha kino kino ki bynta donkam ban ioh da ki briew kiba la don ka jingshemphang ne experience ban iaid beit iaid ryntih ka kam ka jam, kumjuh ruh haka election MLA/MDC donkam ban jied da uba la experience bha, khnang ba ka 5 snem kan ym kut tang haka jingwad jingkhang ha Secretariat bad District Council, da kaba pynskan ba u Ma Thombor umdei u nongwad jingkhang hynrei u nongialam ban wanrah iaka roi ka par.

U Ma Thombor Shiwat ula jop la laisien iaka Election MDC bad pynpaw ruh ka jingsngewskhem ba ki paidbah kin pynjop biang ia u ha kane ka kynti khnang ba un pyndep ia kiba bun ki kam pynroi hapoh ka constituency.

Haba kyntu iaki paidbah ban shimkhia haka kam jied nongmihkhmat, u Ma Dhar ula ong ka election kam dei ban shong kali motor, bam dih kyrhai hynrei ban jied ia u syiem ban synshar bad iada iaka jaitbynriew.