Ka NHAI ka dei ban buh tang kawei ka toll gate ha Jaiñtia & dawa siew bai musur khyndew: JSM-ER

Syllad | The Rising MeghalayaMarch 19, 2019

LUMSHNONG: Ka Jaiñtia Students Movement (JSM), Eastern Region (ER) kala hiar sha ka kyrdop (Toll Gate) ka NHAI kaba don ha Lumshnong ban khang tala ïa kane ka khyrdop namar ba kala pyndik ïaka leit ka wan u paidbah naka daw ba khapngiah ka jaka.

Kane ka jingthmu ban khang tala ïaka khyrdop kala pulom, hynrei ki nongïalam ka JSM-ER hapoh ka jingïalam u Shnalad Rymbai, President bad kiwei kiwei ki dkhot ka JSM-ER kila ïoh ka lad ban ïakren bad u Executive Magistrate ka East Jaiñtia Hills District Bah Sanborn Marwein.

Kila pynsngew ha u Magistrate ba dei ban weng mardor ïa kane ka toll gate ka NHAI ha Lumshnong namar tang hapoh 50 KM ka NHAI kala buh ar tylli ki khyrdop khlem pyrkhat ïaka jingeh u paidbah ka East bad West Jaiñtia.

“Ka NHAI kala leh bor shaba palat ha kaba tang hapoh 50 KM ka jingngai kala buh ar tylli ki khyrdop khlem pyrkhat ïa u paidbah nalor ba suki ka rukom pynïaid ïa kine ki khyrdop khrong pisa”, la ong u Shnalad Rymbai. Ula bynrap ba ki paidbah ka East Jaiñtia haduh mynta ym pat lah ban siew dep ïaka bai musur khyndew naka bynta ban shna ïaka surok.

Ka JSM-ER kala dawa naka NHAI ban shna pyndep ïaki nala ne ki nur ki jaka iaid kjat (footpath) ban shngain kai aid ka ieng u paidbah.

U Executive Magistrate ula kular shimkhia ban pynsngew sha u DC East Jaiñtia Hills halor ka jingdawa ka JSM ER bad la pynbeit ban ïakren lashai ka sngi halor ka toll gate ha Rilum Jaiñtia bad ka JSM-ER kala byrthen ba lada ym ïoh iaki jingdawa kan ïakhih da kaba tyngeh.