Ka NHAI kadei ban pynjem iaka jingsahkut kali bad maramot iaka surok NH 6: KSU

Syllad | The Rising MeghalayaJune 3, 2022

Ka surok bah National Highway 6 ne ka surok Shillong Jowai Silchar kala wanrah ka jingeh kaba khraw iaki nongleit nongwan bad ka jingsahkut kali kaba jur khlieh la ka sngi bun bun kynta.

Kane ka surok bah naduh na Mynkre, Sonapur ter ter haduh Ratacherra bad Malidor kadei ka surok kaba jur bha ka jingtwa khyndew. Dangshen ka jingjur u slap kala wanrah ka jingtwa surok kaba jur bad kala wanrah iaka jingkhapngiah bad jingjulor ka surok.

Ka Khasi Student Union (KSU) Narpuh Circle halor kane kala pynpaw ka jingsngewkhia kaba jur namar ba NHAI kam pat lah satia ban pynjem iaka jingeh u paidbah ba iaid ba ieng na kane ka surok bah.

“Haduh mynta ka NHAI kam pat lah satia ban pynkhuid iaka surok bad kala wanrah iaka jingsahkut kali khlieh la ka sngi,” la ong u president ka KSU Narpuh circle Phanuel Tongper kiba la jurip iaka surok haka sngi Balang naduh Mynkre haduh Malidor.

Ula ong ba ka NHAI kala pyndonkam tang ar tylli ki JCB ne ki puh shilum ban pynkhuid iaka surok, bad kane kala buh jingeh iaka iaid ka ieng ki kali.

“Ka NHAI kam shym la maramot satia ïaki jaka ba sniew ka surok kiba dap da ki thliew ki syar ha shilynter ka surok bah bad kam long kaba shngain iaki kali kit mar bad ki kali rit ban iaid ha kane ka surok,” la ong une u nongialam ka KSU bad ula kyntu iaka bor synshar district ban shimkhia ban pynjem ia kane ka jingeh u paidbah ba iaid lyngba kane ka surok bah.