Ka Niam Behdieñkhlam

Syllad | The Rising MeghalayaJuly 10, 2022

I por-i samooid da poi i ïow tyngkheiñ ïow snem-ïow bnai deiwa pyndep ïa ka ñiam-ka rukom chisien chisnem katkam ki hukum-ki adong U Tre-Kirot Kynrad. Ki khon ka Raij-ka Muluk da ïa kmen-ïa risa, ka chnong-ka thaw da sawa wa ood i sur ka bom wa ka bhuri; kitae ki sngi kiwa u Tre-Kirot da kular u ha u khon Ñiaw-wasa-Ñiaw-wasung da poi ki. Nadooh ki khynnah hadooh ki waheh da ïa pynkhreh jar la ki bynta ïong ki nadooh i chna rot, i pynkhooid chnong-pynkhooid thaw, i pynkhooid ïung-pynkhooid sem, i thied riam-thied beit, neitae ter-ter. Nei liang ki Khadsoo Waheh-Khadsoo Wasan leh da pynkhreh ïa ki kaam ñiam-kaam rukom katkam ki sarin ïong ka ñiam wada booh. Ka por Behdieñkhlam toh ka por wa tympang ha ki khon ïong ka Ñiamtre wei wa ïooluti bha ki chisnem-chisnem ïa ka. Man ko leh ka por kawa kitu ki khon ka Raij Jwai kiwa em cha bar u ryngkaw u won ki cha chnong tre ïong ki ïow ïa emlang chirup wa ki kur-ki kha ïow pyndep ïa ka ñiam.

Ïa ka Ñiam Behdieñkhlam da sdang da ki lehñiam naduh u bnai Wisu hadooh u Naiynñiaw, na kini ki jinglehñiam wa rap bna toh ka Thoh Langdoh, ka Kñia Khang wa ka Kñia Pyrkhat. Man da dep kini tae ïoh u sdang ïa ka chad ka kmen ha ka Soo-sngi-le-ïaw—Pynsiñ, Mulong, Musiang, Muchai—ha u Naiynñiaw. Waroh ha Ri-Jaiñtia du kiwa tip hi i jingmut ïong i kyntien ‘Behdieñkhlam’ tangwa du khajak donhi kiwa tip ïei jingmut wa pura ka Ñiam Behdieñkhlam, wot ki khon ka Ñiamtre leh em ki wym tip. Jooh ïoo bha i cha kotkhubor lane cha ki artikel ha internet wa batei watoh ka Behdieñkhlam toh ka ñiam wow beh ïa ka khlam; hynrei itae toh chibynta donhi i jingmut kani ka ñiam. To yn peit i nei-ï i daw wa u khon Ñiaw-wasa da leh u ïa ka Ñiam Behdieñkhlam.

Ïa ka pyrthai da chna le bynta: i Sorkep, i Bneiñ wa ka Sla-khyndaw-Pyrthai. Nachwa-nalap ki sngi, ha Bneiñ da em Khadynru-wasa—u Khynde-wasa wa u Ñiaw-wasa. U Khynde-wasa man u uwa dap-wa biang wei wa stad-wa tip katwa u Ñiawwasa won man u uwa dooh-wa duk wei wym biang ka stad-ka tip. Ha Sorkep won em u Tre-Kirot wa ki Puri ki wym em i jingkut, kiwa im ïanom-ïanom. U Tre-Kirot Kynrad toh u Syiem Blai wa ha khlieh tam, wei lyngba ïong oo da pynman ïa waroh kiwa da man; man u uwa stad wei ïei stad ïong oo ym em wa ïe u tip. Ha Sla-khyndaw-pyrthai won ym em iï-iï leh wei dang em du ka moosiang-mootha, man ko kawa dang langam kiawkiaw-kawkaw neidaw ym pu em jingthaw wa em mynsien. Toh I mon ïong u Tre-Kirot wow wanrah ïa u Ñiaw-wasa cheini cha Sla-khyndaw-pyrthai katwa u Khynde-wasa won u neh u ha Bneiñ. Kamtae, u Tre-Kirot da jied ïa u Woh Lakriah napyrdi u Ñiaw-wasa wow ïah luti ïa ki cha Sla-khyndaw-pythai lyngba ka Tangnoob-ka Tangjri. U Kynrad da pynman—lyngba ka Bei Wabooh, wa u khon u ïong ka u Thakur; wa ka Bei Rym-aw, wa u khon u ïong ka u Khad—ïa ki jingthung, ki mrad, ki sim, ki dkha, ki loom, ki synrang, ki wah, ki duriaw, ki liar, ki thwai neitae ter-ter. Kamtae ïa ka Sla-khyndaw-pyrthai da pynman kam wa da man katni. Da sah u  Ñiaw-wasa heini wei u Woh Lakriah da man u kam u nongïalam wa stad u ïong ki. U Tre-Kirot leh jooh won peit-won ïoo beit u ki man la ki por. Da lai ki por-ki sngi, wei u Tre-Kirot da kwah u u pyndep noh ïei mon-ïei khie i ïong oo. Da khut u da ka Dorbar, wei ha kani ka jingïalang da e u da ka aiñ-ka ïutang wa kammon u Ñiaw-wasa u im u heini ha pyrthai. Iwon-iwon iwa mih na u thylliej-ksiar ïong u Kynrad ha katae ka Dorbar da man ki ki hukum wa ki jingngeit kiwa u Ñiaw-wasa katni da khut u, ka Ñiamtre. Ha kani ka Dorbar, u Kynrad da ong haroh u wa u lai noh u cha Sorkep wei wa nadooh katae ka sngi wym em khmat-bru de wa ïe u ïachem wa oo, u ïe u ïachem wa oo su ha ka ngooh-ka dem wa ha ka suid-ka choor donhi. “Kattu ka khmat-bru wym chynna de ko ïa nga. Ym won de o markhmat wow bru”. Kini ki kyntien u Tre-Kitot da man ki kam u pyrthat wa thlieh ha u dohnood ïong u Lakriah wow Ñiaw-wasa. Heini, da khynblob ki khmat u Lakriah, da tlot u waroh chirynïieñ, wei wym tip de u tang u klam leh wa da joor itae i sñiaw khonswet ha mynsien u. U Kynrad wa stad da ïoo u ïeini wei wym lyndet u oo u Ñiaw-wasa, tae ong U, “Lakriah, ym ieh noh-noh o me. Daw won peit o chisien-chisnem, u sah o soo sngi, le ïaw. Heini u won peit o me, em iwa kwah o na me; me i ï u e mi ïa nga? Tangwa u Lakriah ym ïe u u jubab wa dang kthang i mynsien u. “Heini iwa u won li peit o me, kwah o u ïoh na me da ka chad”, ong u Kynrad. Neibhah kani ka hukum, u Ñiaw-wasa da pynman u ïa ka Chad Behdieñkhlam. Da ong chooh-chooh U, “Tang wow man mi uwa chad hok, ïoo ïa man mi uwa chad khu-iang. Lada man mi uwa chad khu-iang, ym ïoh mi ïa nga……chad hok hajrong i ktieh, chad hajrong i biar, chad hajrong ka moo, chad hajrong ka dieñ; chad heiwon-heiwon i thaw iwa ong mi iwa jakhlia. Da pyndap dei mynsien i ïong nga hei rupai i ïong me, ïow man mi uwa chait-uwa khiah”. Kamtae, da lai beit ka Dorbar. U bru da pyrchang u ïow sñiawthooh wei wow bood ïa ki hukum u Tre-Kirot. Da talung ki por-ki sngi, da kut i por u Lakriah, da poi i por u Syiem Chyllong, kut i por u Chyllong, da poi i por u Syiem Synriang, tae i por u Synriang leh poi i cha wa kut. Kamtae, chiboon ki pateiñ wa wan-wa lai, u Ñiaw-wasa da rap mylliñ khajak-khajak ïa ki hukum u Tre-Kirot. Hadein-hadien, u Syiem Pyrthat lyngba i chwar ïong u Tre-Kirot da wanrah ïa ki soo-ngut chipaïu—Ka Bon, Ka Teiñ, Ka Wet wa Ka Doh—ha chnong Jwai. U khon ka Weipun Wet, u Dongsaniriang da man u u Daloi wa nyngkong dooh ïong ka Elaka Jwai, wei ha i mynisen ïong oo da psiah dei mynsien u Tre-Kirot. Ïa ka Ñiam Behdienkhlam katkam wa tip i ka katni toh da pynchong pynthiah da u Pa Daloi Dongsaniriang. Ha kini ki sngi, ïa ka Ñiam Behdieñkhlam du ynñiaw tylli donhi ki Raij wa pyndep, kitae toh: ka Raij Chyrmang, ka Raij Jwai, ka Raij Tuber, ka Raij Mukhla, ka Raij Ïalong, ka Raij Muthlong wa ka Raij Sohkymphor.

Ha kini ki ar snem wada lai, ïa ka Ñiam Behdienkhlam ym em ïoh u pyndep kam wajooh leh. Ka langthari hei dur ïong ka khlam Covid-19 da wan sympat ko ha u snem 2020, katwa kamtae ha utae u snem, ïoh u leh du i ngooh-i dem donhi khlem ka lehñiam wei khlem ka chad. Ha u 2021 won ïoh hi u pyndep ñiam wei chad tangwa du 20-30 ngut donhi chi dong wa ïoh u ïachim bynta. Ka khlam Covid-19 tae ym pu em wiar ko, ïoo luti wa ha uni u snem u pyndep ïa ka Behdieñkhlam ïow pakhet-palieñ ïa ka kani ka kjut-ka sang.

Dang em sa iwi i por wa wan ka langthari wa pyndooh ïa ki khon ka Ñiamtre u chad Behdieñkhlam, itae toh hei por ka Sorkar Phareng. I daw wa khang ïa ka Chad Behdieñkhlam toh wa em ki kattu-katni ki bru wym pu che wa jooh ïa pynawri-awra ha kani ka chad ñiam. Hynrei, ka thong kawa em hapoh i mynsien arsap ïong ka Sorkar Phareng pyn-at-rupai toh ïow pynduh-pyndam ïa ka ñiam-ka rukom wa ka dustur-ka riti ïong u Ñiaw-wasa. Kamtae, da pyndooh ïa ka Ñiam Behdieñkhlam na u snem 1931 hadooh 1947; wei wa da maham joor ko leh ïow pynchitom wa ïa kitu ki waheh ka raij kiwa em ha Shillong wym hoi u won ki cha Jwai ïow pynïakhih ïa ki khon ka Ñiamtre neibynta i hok i ïong ki. Nadooh i por ïong u Woh Kiang leh da leh thombor ko deiwa khang ïa ka Ñiam Thangbru, ka Chad Pastieh ha Ïalong wa kiwi-kiwi ki jingleh wa pyndooh mynsien ïa ki khon ka Ñiamtre.

Hawa khaddooh dei jingkreh chitom ki waheh na kylleiñ ka Ri India, da ïoh ïa i jinglaitlooid ha ka 15 tarik, Naisaphra 1947. Kamtae, ha ka sngi laitlooid, ki khon Ñiaw-wasa kiwa chah thombor ha ka Sorkar Phareng, i sñiaw ïong ki man i kaitu i por wa wan lichoo u Khon Lymboit-Lymbiang ïa ka Syiem Sngi na Krem Lamet-Latang hadien i jingdoom, neibhah ka Behdieñkhlam toh i doh wei tyrsim ka ñiam-ka rukom ïong ki, wei snam ïong ki toh chong ko ha ka ñiam-ka rukom. Kamtae, ha uni u snem, toh lang wei dap 75 snem i jingïoh laitluid ka Ri India, ka Behdieñkhlam leh u pyndep ïa ka heijuh i sur.

Na kini ki daw, ka Behdieñkhlam ha uni u snem daw man ko kawa tympang chooh-chooh ha uwi-pa-kawi u khon ka Raij Jwai. Behdieñkhlam wasuk-wakmen ïa waroh.

Da u Heirtami Paswet