Ka NPP ka bunkam ban wanrah kam pynroi, ym don por ban kren ia ki jingkynnoh khlem nongrim: Dy.CM

Syllad | The Rising MeghalayaFebruary 6, 2025

U President ka National Peoples’ Party (NPP) ha Meghalaya uba dei ruh u Symbud Myntri Rangbah ka Jylla, u Bah Prestone Tynsong u la ong ba ka sorkar MDA ba la ialam da ka NPP ka bunkam ha kaba wanrah ia ki kam pynroi na ka bynta ka jingmyntoi jong u paidbah ka jylla bad kam don por ban iakren halor ki jingkynnoh ba khlem nongrim jong ki party liang pyrshah.

Ia kane u Bah Prestone u la pynpaw ha ka jingialang ialap elekshon ha ka 5 tarik Rymphang ha ka shnong Umwang, Ri Bhoi District ban pan jingkyrshan ia ka kyrtong jong ka party bad MDC barim ka kong Rona Khymdeit ka ban iakhun na Nongpoh constituency.

U Bah Prestone u la ong ba ka sorkar ba la ialam da ka NPP ka la shah kynthoh jur namar ka dei ka sorkar kaba treikam bad kaba shakri hok ia ki paidbah bad ia ka jylla hi baroh kawei.

Haba kyntu ia ki paidbah ba kim dei ban ngeit ia ki jingkynnoh bym shisha jong ki liang pyrshah, u bah Tynsong u la ong, “Ki la kynnoh ba ka NPP ka bamsap bad ka party jong ki high level hynrei kim nud ban ujor sha ka ain namar kim don ia ki sakhi satar ban pynshisha. Balei ki tieng ban ujor sha ki bor ka ain lada kine ki jingkynnoh ki dei kiba shisha? Kumta ka long ka bym don jingmut ban shu kynnoh khlem ki sakhi satiar.”

Nalor kata u Bah Prestone u la ong ruh ba ka sorkar ba la ialam da ka NPP ha kine ki phra snem kiba la dep ka la wanrah ia ki polisi treikam bapher bapher kiba pynmyntoi ia ki paidbah ka jylla kaba kynthup naduh ki nongrep, ki nongtrei bylla sngi, ki nongniah kali bad kiwei kiwei.

U la pyntip ruh ba shen ka sorkar kan sa thaw noh ia ka Apex Cooperative Society ban aijingkyrshan shuh shuh ia ki Cooperative Society, ki Self Help Group bad ki Village Organisation da kaba ong ba kan iarap ban plielad ha ka liang ka ioh kam ioh jam na ka bynta ki nongshong shnong ka jylla.

Haba kyntu ia ki paidbah ba kin aijingkyrshan ia ka Kong Rona Khymdeit, u Bah Tynsong u la ong, “Ka Kong Rona ka la iatreilang ryngkat ryngkat bad ka sorkar na ka bynta ban wanrah ia ki kam pyntoi hapoh ka constituency. Lada kan shah jied, ngi pynthikna ba ka constituency kan sa ioh shibun bah ki jingmyntoi ha ki kam pynroi bad ki lad jingiarap bapher bapher.”

U Symbud Myntri Rangbah u pyntip ruh ba na ka liang ka sorkar ka la mang ia ka song pisa kaba haduh palat T.100 klur bad ka la dep ruh ban ai ia ka work order na ka bynta ban shna ia kasurok Nongpoh – Umden sha Sonapur. U pyntip ba mar ia kut kane ka elekshon, ka tnad PWD kan sa sdang pyntrei noh ia kane ka surok na ka bynta ka jingmyntoi u paidbah ka thain.