Ka NPP ka dei ka jingkieng sha ka Sorkar, ong u Prestone haba pan jingkyrshan ia u kyrtong ha Wapungskur

Syllad | The Rising MeghalayaFebruary 12, 2025

U State president National People’s Party (NPP) bad Deputy Chief Minister Prestone Tynsong, ula hiar sha ka shnong Wapungskur haka 12 tarik Rymphang ban pan jingkyrshan na ka bynta u kyrtong MDC ka NPP sha ka Jaintia Hills Autonomous District Council (JHADC), u Phasmon Dkhar na ka Musniang Rangad MDC Constituency.

Haba kren haka jingialang, u Bah Prestone ula ong ba haduh kine ki sngi, kaba mynta ha kane constituency jong phi bad ka jylla baroh ka dei ba ngi la lah ban wanrah iaka roi ka par. Ka nuksa kaba bha tam eh na ka bynta jong phi hangne ha constituency, khamtam ka Wapungskur, ka dei ka jingioh iaka C&RD block headquarter, ka dei kaba burom kaba khraw bad jingkyrkhu iaka shnong baroh kawei.

Ula pynkynmaw ruh haka ba shuwa ka elekshon 2018, la pynkynriah iaka Wapung C&RD Block sha Lumshnong. Kynsan kynsan kala mih noh ka notification ban pynkynriah iaka block namar ka politics. Dei hadien nga la mih ban pynsiasoh sha ka NPP bad ngi la jop bad thaw iaka sorkar ngi la rah biang iaka Wapung C&RD Block ha Wapungskur.

“Kaba kham sngewtynnad shuh shuh phi la ioh ruh iaka centre ban ialeh iaka eksam matrik kaba wanrah iaka jingsuk bad jingkyrkhu kaba khraw ia ki khynnah kin ialeh matrik ha Wapung,” la ong u ba Prestone

U Bah Prestone  ula ong ba ki paidbah ki dei ban bishar bniah bad kin ieng Rangbah, namar ba ka riti dustur, ka bor ka itkiar, kan sa twa noh shen lada wan kiwei pat ki bor. Ula kyrpad ia u paidbah ban kyrshan iaka NPP, namar ba nangne ka thain ka jingkieng kaba jan bad ka sorkar ka dei lyngba u Phasmon bad u Dy CM ma Sniawbhalang Dhar na Jaintia HIlls baroh kawei.

U ne u nongialam ka NPP ula ong, “Kynmaw bha haba kren iaka subject pdeng jong ka jaidbynriew, ngi dei ban peit nala tynrai. Hynrei ka juk kaba mynta, ka kyrteng jaidbynriew ka dei tang ka sla dieng, bad tang shu beh ka lyer, hap lut artad plain. Kane ka subjek ka rung bha ha ki samla.”

“Ngi na kaliang ka sorkar, kiba bun ki bah prokram kila pynkhreh iaki samla ha ryngkat ki training ban pyntbit lyngba ka skill development, ban ai kam ai jam iaki samla. Hynrei wat sngap ne ngop tang ia ki jingkynnoh ba lamler ki seng sain pyrthei,” la ong u bah Prestone.