Ka NPP ka la long kaba la pynkhreh na ka bynta ka elekshon shiteng samoi bad MDC: Ampareen

Syllad | The Rising MeghalayaOctober 15, 2024

Ka Nongialam ka NPP kaba dei ruh ka Myntri Sorkar ka Kong Ampareen Lyngdoh ka la ong ba ka party ka la long kaba la pynkhreh pura ban ia aireng ha ka elekshon shiteng samoi ha Gambegre kumjuh ha ki elekshon MDC hapoh Rilum Khasi bad Jaintia.

Haba kren sha ki lad pathai khubor ha ka 14 tarik u Risaw, ka Kong Ampareen ka la ong, “Ka NPP ka dei ka party kaba ju pynkhreh bha ia lade ha man la ki elekshon, kata la ka long ha ki elekshon Assembly sha ki District Council ne MP.”

Da kaba pynpaw ba ka NPP kan iakhun ban jop ia ka Gambegre seat, kane ka Myntri ka la ong, “Ngin iakhun ia kane ka elekshon shiteng samoi bad pyrshang ban ioh bat ia kane ka seat. Ngin pyrshang ban knieh noh na kiwei ki party namar ha kum kane ka por ka jingskhem ha ka synshar khadar ha ka Jylla Meghalaya ka dei kaba donkam bha.”

“Ngim tip kiei ki jingiatai ki ban mih hynrei ngi shu duwai ba ngin ym iapait iapra hapdeng jong ngi da kaba pynshong nongrim halor ki jaidbynriew, ka niam ha ki kam ki jong ngi bad kiwei kiwei pat ki bynta,” ka la bynrap.

Nalor kata, ka Kong Ampareen ka la ong ruh, “Lada phi kylli ia nga haduh katno ka jingpynkhreh ka jong ngi, ngi la pynkhreh 100 percent. Ngam pat shym la leit sha madan, hynrei lehse ngam dei ka briew ka ban ai ia ki jingsngew kiba dei halor kane ka kam, hynrei la pynshai ha nga ba ngi don ha ka jingiakhun ha kine ki elekshon. Wat ym khein troin ia ka jingpynkhreh ka jong ngi.”

Ka NPP ka la pynieng da ka kurim jong u Myntri Rangbah Conrad K Sangma, ka Mehtab Chandee Sangma ha kane ka elekshon shiteng samoi na Gambegre ia ka ban sa pynlong hadien ka jingkehnoh kam da u MLA ka Seng Congress u Saleng A Sangma hadien ba u la shah jied kum u MP ka Tura.