Ka NPP kam pat ju iapein halor ki mat kiba iadei bad ka bha ka miat jong ka Ri; ong u CM

Syllad | The Rising MeghalayaApril 2, 2024

U National President ka Seng National People’s Party (NPP) uba dei ruh u Myntri Rangbah ka Jylla u Conrad K Sangma haka 1 tarik Iaiong u la ong ba ka party NPP kam pat ju iapein satia ha kaba iadei na ka bynta ka bha ka miat jong ka Ri.

“Ka jingiadei hapdeng ka NDA bad ka NPP ka dei kaba la don palat shiphew snem mynta, bad ka dei kaba khlain shibun. Ngi la iakynduh ia shibun ki jingeh, hynrei ha kaba iadei halor ki mat na ka bynta ka bha ka miat jong ka ri, ngi la phaikhmat nyngkong shwa sha la ki jong ki nongshong shnong,” ong u Conrad ha ka jingialang ialap ilekshon ban pan jingkyrshan na ka bynta ka kyrtong ka NPP napoh 1-Shillong Parliamentary Constituency ka Kong Ampareen Lyngduh hynne ka sngi Nyngkong ha Jhalupra, Shillong.

U la ong ba ka NDA bad ki paralok synrop jong ka ki iatylli mlon ha kane ka Lok Sabha ilekshon namar baroh ki don ia ka jingngeit ba hapoh ka jingialam jong u Myntri Rangbahduh ka Ri u Narendra Modi ka India kan kylla long ka ri kaba kiew shaphrang ha ka liang ka ioh ka kot ha ka pyrthei.

“Ka India kan sa long ka Ri kaba don ha ka kyrdan kaba lai ha ka jingkiew ha ka ioh ka kot kat haduh u snem 2028 bad kan sa kylla long ka ri kaba la roi shakhmat (develop) kat haduh u snem 2048. Kane ka jingioh jngai jong u PM Modi ka la pyniatylli ia ngi, bad ngi la wan ryngkat lang ban aijingkyrshan iwei ia iwei pat ban poi sha ka thong jong ka Ri India kaba kiew shaphrang,” u la ong shuh shuh.

Haba kren ia ka sorkar ba la ialam da ka NPP ha Meghalaya, u CM u la ong, “Ha kine ki hynriew snem jong ka jingsynshar ka jong ngi ia ka Jylla ngi la iakynduh ia shibun ki jingeh, hynrei ngi la lah ban iakhun pyrshah ia ki bad ban pyniaid shakhmat ia ki jingtreikam kiba thmu ban pyniaid shakhmat ia ka Jylla. Ha u snem 2015 ka mangtyngka jong ka Jylla ka long T.7000 klur, ha u snem 2018 ka long T.9000 klur bad mynta ka mangtyngka ka jylla jong ngi ka long haduh T.27000 klur kaba la kiew haduh saw shah.”

Haba iakren halor ka jingskhem jong ka sorkar na ka bynta ban ioh ia ka synshar khadar kaba bha, une u nongialam ka NPP u la pynsngew ha ka jingialang ba ka Meghalaya ka la sakhi ia khyndiat eh ki sorkar ba skhem, bad ka NPP lem bad ki paralok synrop ki la pynthikna ia ka sorkar kaba skhem ha ka Jylla bad kaba la lah ban pynsted ia ka roi ka par bad ka jingkiew shaphrang jong ka Jylla.

“Ki liang pyrshah jong ngi ki la ong ba ka kynhun synrop jong ngi kan neh tang ar bnai, hadien hynriew bnai bad hadien shi snem, hynrei ngi la lah ban pyndep ia ka samoi treikam kaba pura. Ha u snem 2023 ki paidbah ka Jylla ki la ai biang ka jingshaniah ha ngi bad ngi la lah ban thaw ia ka sorkar bad ngin sa pyndep ia kane ka samoi ruh kumjuh,” ong u Conrad da kaba bynrap, “Hadien bun phew tylli ki snem ka la don ka sorkar kaba skhem hapoh ka Jylla bad bad ki dang don shibun kiei kiei kiba dang hap ban leh na ka bynta ka Jyllad bad ki nongshong shnong jong ka.”

Ha kaba iadei bad ka jinglong jingman ha ka Jylla, u CM u la ong, “Ha kiba bun ki khep ngi la iatyngkhuh ia ki jingeh na ka jingmih jong ka huri hura hynrei ngi la lah ban tehlakam ia ki. Ngi don ia ki nongshong shnong na ki jaidbynriew bapher bapher ha ka Jylla, bad kam long kaba suk ban pyndon lang ia baroh, hynrei ngi pynthikna na ka bynta ka bha ka miat jong ki briew jong ngi bad ruh ban ai ia ka jingshakri kaba bha tam.”

Hapdeng ka jingkren kaba dang khluit bha, ki riewngeit Muslim ki la pynlong ia ka jingmane Blei hapoh ka Mosque kaba don marjan, bad kane ka la pynlong ia u CM Sangma ba un sangeh ia ka jingkren tad haduh ban da dep ka jingleh niam ka jong ki.

Nalor kata ha kaba iadei bad ka New Shillong Township, u CM u la ong ba hashwa ka ilekshon, ka sorkar ba la ialam da ka NPP ka la mang haduh T.10,000 klur na ka bynta ban shna ia ki surok, ban pynbiang ia ka umbam umdih, ki ophis treikam bad ia ka sorbah ka jingnang jingstad hapoh New Shillong, bad ha kine ki saw snem ki ban wan ka Shillong kan sakhi ia ka jingkylla kaba khraw.

Shuh shuh haba kyrpad ia ki paidbah ba kin ai ka jingkyrshan ia ka kyrtong ka NPP ka Kong Ampareen Lyngdoh, u Conrad u la ong, “Ka Kong Ampareen ka dei ka kyrtong kaba biang tam ban mihkhmat ia ngi shapoh parliament. Kan kren na ka bynta ki briew ki jong ngi.Ka sorkar NDA kan wan biang ha ka bor hapoh Delhi bad ka long kaba kongsan ba ngin don ki kyrtong NDA ki ban shah jied na ka Jylla jon ngi. Ka NPP ha ka Jylla bad ka NDA hapoh ka sorkar pdeng kan pynlah ia ngi ba ngin iatreilang ryngkat ryngkat na ka bynta ka roi ka par jong ka jylla,” ong shuh shuh u nongialam ka NPP.