Ka NPP kan pynduh iaki District Council ban die duh ia u dewiong bad mawshun ong u Moonlight Pariat kandidate UDP na Jowai

Syllad | The Rising MeghalayaJanuary 13, 2023

U Ma Moonlight Pariat president United Democratic Party (UDP) uba long ruh u candidate ka UDP na 2 Jowai Constituency ula ong “Lada phi (paidbah nongshong shnong) phi kwah ban ioh ia u Chief Minister na Ri Lum Khasi Jaintia, phi dei ban jied ia ki kyrtong jong ka UDP kum ki MLA, namar lada phi jied ia ki kyrtong MLA na ka TMC ne ka NPP phin ioh Chief Minister na ri lum Garo.”

Ula ong ba dei tang ka UDP kaba dei ka party trai ri kaba sngewthuh iaka eh ka shon u trai ri trai muluk, hynrei lada wan pat ka Trinamool Congress (TMC) lane ka National People’s Party (NPP) haka bor, katta ka mut u Chief Minister ka Jylla kin dei beit na rilum Garo bad kine ki dei u Dr Mukul Sangma bad u Conrad K Sangma.

U ma Moonlight ula ong ia kane haba kren haka jingialang paidbah kaba long ha Seinraij Complex ha Iawmusiang hakhmat ka DC ophis, Jowai haka sngi Thohdieng.

U Ma Moonlight haba kren shuh shuh ha kane ka jingialang ula ther tyngeh ia u myntri sorkar bad MLA ka Nartiang u Sniawbhalang Dhar uba la kren paidbah ban pynkylla iaka DC ophis Jowai sha ka shopping Complex.

Ula ther ruh iaka NPP halor ka jingplie iaka Maternal and Child Hospital (MCH Hospital) ha Panaliar kaba haduh mynta la khang da u tala. Ula ong ba kane ka jingplie ia kane ka hospital kadei tang ka jingpynbiej election ia u paidbah kane ka thain.

Ha kaba ïadei bad ka jingsahteng ïaka jingtei ïaka Ïawmusiang Complex kaba dei ka ïit khmih jong ka rilum Jaintia, u ma Pariat ula pan ka jingkyrshan jong u paidbah ba kin jied ia u ban long u nongmihkhmat bad pyndep ia ka Iawmusiang kaba thymmai ban pynsuk iaki nongshong iew shonghat kiba kamai kajih na Iawmusiang.

U Ma Pariat haba kren shuh shuh ula ong ka don ka jingthmu ban pynduh pyndam iaki Autonomous District Council bad ka Sixth Schedule da ka NPP lada ka wan biang haka bor ha kane ka election MLA 2023.

“Ki District Council ki dei ki mawjynthuh jong ka NPP ban die duh ia mawshun uba don haduh 400 million ton bad dewiong haduh 600 million ton katkum ka jinglum jingkhein ka Atomic Minerals Division jong ka sorkar India” la ong ma Pariat.

U Ma Pariat uba ju long ruh u Chief Executive Member ka JHADC ula ong ba ka Supreme Court ka Ri India kala bthah iaka NGT bad ka Coal India Limited ban die lilam ia u dewiong uba 32 lakh metric ton, hynrei haduh mynta myne ka sorkar MDA kaba ialam da ka NPP ka pynslem ban lilam bad plie lad ia kita ki High Level ban pyniaid ia u dewiong da kaba beaiñ bad wat ka khajna ruh kam poi sha ka pla tyngka ka sorkar bad ki district council.

Kane ka jingshalan beain ia u dewiong kala pynlong iaka JHADC ban duh iaka khajna da ki klur bad kaba la wanrah pat iak jingduh tulop ki nongtrei ka konsil da ki bun bun bnai, la ong u ma Pariat bad haka juh ka por ula iaroh iaki nongtrei ka konsil kiba wat hapdeng ka jingduh tulop manla ka sngi ki leit trei leit ktah, bad pynpaw ruh iaka jingsngewdiaw ba wat ia u jhur bad ban pynbiang ka bam ka dih kin hap ban shim ram.

U Ma Pariat ula ong khot la wer iaki paidbah ban ai ka jingkyrshan ia u bad kyntu iaki paidbah ban jied ia u bad ka party UDP ban pyllait ia u dewiong khnang ba kin nongkhaii kin ioh ban khaii bad tih khlem ka jingshah teh kyndon.

“To ngin kyndit bynriew ban ai ka jingtreilang bad kyrshan ïaka party UDP kaba dei ka party trai ri ha kane ka 5 snem ban wan khnang ban im ka ri bad ka jaitbriew bad ban pynkhie im biang ïaka khaïi ka pateng bad ba ki nongshong ïew shong hat kin lait ban shong shan ngap kamba ki shong mynta haki ïew ki hat namar ba la hiar ka ïew ka hat, la ong u Ma Pariat.