Ka party kaba nga jied ki paidbah kim pdiang, nga join bad ki: RL Tariang

Syllad | The Rising MeghalayaAugust 24, 2022

U Ma Riang Lenon Tariang, u deputy speaker barim ka iingdorbar thawain ka jylla bad u MLA barim ka Amlarem Constituency ula ong ka Party kaba u jied ki paidbah kim pdiang kumta kala pynlong ia u ban rai rangbah bad bud lang bad ki paid nongkyrshan jong u.

Ia kane ula ong haba kren bad ki nongthoh khubor ha Amlarem ha sngi ba ar haka jingiasoh sha ka party National Peoples’ Party (NPP) ryngkat bad ki nongkyrshan jong u ban kyrshan da kawei ka sur ia u ma Stephan Mukhim, u kyrtong ka NPP na Amlarem.

U Ma Tariang ula ong ba u paidbah ula iehnoh ia u bad ka party kaba u la jied ruh ki paidbah kim pdiang bad u ong “haba phim lah bad ki join noh bad ki” bad bynrap ba um lah ban pynsngewthuh shaphang ka party kaba ula jied bad ula rai kut bad leit lang bad ka sur u paid nongkyrshan jong u.

U Ma Tariang ula ba ula don bad ka United Democratic Party (UDP) naduh ba ula mih aireng iaka elekshon, ula bat ruh ia ka kam president UDP ha u snem 2016-17 bad shisnem tam shwa ka election ki nongialam ka UDP ki weng kam noh ia u khlem ka jingtip jong u.

“Shisnem tam nga khlem khih ne weng dkhot na ka party UDP, hynrei ka party UDP kam donkam shuh ia nga te ki don noh ki nongwan khot bad ban iasoh noh bad ka BJP,” la ong u ma Tariang.

Ha u snem 2018 ula mih aireng elskhon na ka BJP hadien ba ula shah rem u dang iaineh haka party BJP hynrei ha kine ki saw snem shiteng ym don eiei kita ki activities na ka party bad ka rukom treikam hapoh ophis ha Shillong ruh um iahap satia, ong u ma Tariang.

U Ma Tariang u la ong ba kum u riew rim haka sain hima sima u sngewrem ia ka rukom treikam jong ka ophis BJP ha Jylla bad u sngew sah marwei, hynrei u dang kwah ban iarap ia u paidbah kumta ula pyrkhat kaei ka lad ban iarap ia u paidbah.

U Ma Tariang u la ong ba ki nongialam bad dkhot ka party NPP kila wer ia u ban iasoh bad ki bad hadien bala pyrkhat sani u shem ba kane ka party (NPP) ka dei ka party kaba heh te ula jied noh ia kane ka party ban kyrshan bad kawei ruh ka don ka rukom treikam kaba biang bad ka khamsuk ia u ban iasoh sha ka NPP.

U Ma Tariang u la pynshai u la pdiang iaka BJP haka nongrim ba ka BJP ka don iaka policy treikam ka biang palat iaka congress. Ula iathuh ruh ba lyngba ka BJP wan ka Leshka project, national highway bad ka kad khaii pateng kaba heh Tamabil Dawki.

Ula ong ba bun bah ki projek kiba ula maitphang ban sdang ban wanrah iaka roi ka par ka War Jaintia, hynrei baroh ki sahteng namar bym don ba shimkhia ban pynbha ia ka jingriewspah ka War Jaintia. Kumta ula rai ban ai ka jingkyrshan kaba pura ia u Stephan Mukhim bad u don ka jingsngew skhem ba u ma Stephan un wan haka bor ban wanrah iaka roi ka par kaba salonsar.

Kane ka jingiasoh u ma Tariang bad ki nongkyrshan jong u sha NPP, ka buh jingkylli hato ka BJP kan khylliap lama noh ha Amlarem.