Ka Party kan pyntreikam ia kaei kaba ka la ialap, yn ym thung ia ki chairman ha KHADC: Ardent

Syllad | The Rising MeghalayaMarch 1, 2025

U nongialam ba hakhliehduh ka Voice of the People Party (VPP) u Bah Ardent Miller Basaiawmoit haka 28 tarik Rymphang u la ong ba ka party jong u kan pyntreikam ia kaei kaba ka la ialap, da kaba pynthikna ba kan ym don satia ka jingthung ia ki chairman hapoh Khasi Hills Autonomous District Council (KHADC) wat hadien ba u la pynpaw ia ka jingdonkam ban iatreilang bad ka sorkar Jylla na ka bynta ka bha ka miat bad ka roi ka par jong ki paidbah nongshong shnong ka Jylla.

“Ngi la shim ia ka sienjam kaba nyngkong kaba long ban don ia ka Executive Committee (EC) kaba tang phra ngut ki dkhot bad arngut ki dkhot ha ka tnad legislative namar ngi kwah ban kiar pura na kano kano ka jingpynlut phut. Ngi la pyrshang ia kaei kaba ngi ialap bad ki dang don shuuh shuh (ki lad pynduna ia ki jingpynlut) ki ban sa wan,” ong u Bah Ardent haba kren sha ki lad pathai khubor.

“Kumba ngi la ong ngin don tang phra ngut ki dkhot sha ka EC bad arngut sha ka Legislative. Kan ym don kano kano ka jingthung ia ki chairman hapoh ka District Council. Kata ka long kaba shai,” u la bynrap.

Haba kylli la kane ka rai jong ka party kan ym ktah ia ka jingtreikam jong ka KHADC, u Bah Ardent u la ong, “Ia kata lah ban shimkhia tang da ki ophisar bad ka EC. Kumta kan ym dei ka jingeh kaba khraw namar kata ka la long ka rukom kaba ju long ban pyndap ia baroh ki MDC kiba kyrshan ia ka EC, hynrei ngim donkam ia kaba kum kata ka policy namar kata kam dei ka jinglong jingman kaba ngi iakynduh mynta namar ngi la ioh ia ka jingbun paid bad baroh ki MDC jong ngi ki kloi ban sah khlem kano kano ka jingpynkhamti kam hynrei ban kyrshan ia ka EC.”

U Bah Ardent u la ong ruh ba ka VPP kam don satia ia kano kano ka jingthmu ban ialeh pyrshah ia ka sorkar Jylla.

“Ngi la bteng ban pynpaw ia kane ha kiba bun ki khep wat hadien ba la jop ia ka elekshon MP, ngim kwah ban ialeh pyrshah ia ka sorkar Jylla. Na ka bynta ka jingmyntoi jong ka Jylla bad ki paidbah nongshong shnong, ngin iatreilang, bad dei na kata ka daw u MP jong ngi u la iashim bynta bha, u la leit jngoh ia ki jaka bad u la shim ia ki mat bad ka Sorkar Pdeng khnang ban ym iatyngkhuh bad ka sorkar Jylla,” u la ong da kaba bynrap, “Kumta ka shong ha ka sorkar Jylla. Lada ki kwah ban ialeh pyrshah ia ngi, ngi long kiba kloi hynrei ngim kwah ban ialeh pyrshah bad ki. Ngi kwah ban iatreilang na ka bynta ka roi ka par jong ka jylla bad na ka bynta ka jingmyntoi jong ki paidbah.”

Une u khliehduh ka VPP u la bteng ruh ban pynpaw da kaba ong, “Ngi lah ban don ki jingiapher jingmut ha ka por elekshon halor ki mat bapher bapher, hynrei ha kaba iadei bad ka synshar khadar ngim kwah ban thaw ia kano kano ka jingeh namar kane kam dei ka jingiakhun hapdeng ka VPP pyrshah ia ka NPP, hynrei ka dei ka jingiakhun jong ki nongrim bad ki mat. Kumta mynta ki paidbah ki la jied ia ngi ban ioh ia ka bor, kumta ruh ngin iaid shakhmat ia la ka kamram hynrei ym ban iakhun pyrshah iano iano hynrei lada don kiba ieng ha ka lynti, ngin hap ban iakhun.”